Трамп қулаган самолёт учувчисининг қутқарилганини айтди

АҚШ Президенти Дональд Трамп Эрон ҳудудида уриб туширилган F-15 қирувчи самолёти учувчисини қутқариш бўйича муваффақиятли операция ўтказилганини расмий тасдиқлади. Бу ҳақда у журналистларга берган интервьюсида сўз очди.

Президентнинг маълум қилишича, мураккаб қидирув-қутқарув операцияси давомида америкалик қирувчи самолёти экипажи аъзоси Эрон ҳудудида топилган ва хавфсиз ҳолатда эвакуация қилинган. Трамп бу операцияни АҚШ Қуролли Кучлари тарихидаги энг хавфли амалиётлардан бири деб атаган. У қутқарилган офицер юқори мартабали бўлиб, тирик ва соғ-саломат эканлигини таъкидлаган.

Америка ОАВ маълумотларига кўра, қутқарилган шахс қурол тизимлари бўйича мутахассис бўлган. Самолётдан чиқиб кетгач, у махсус тайёргарлик дастури — тирик қолиш, яшириниш, қарши туриш ва қочиш бўйича ўргатилган кўникмаларини қўллаб, душман томонидан ушланишдан қочган. У қутқарув жараёнига қадар пиёда ҳудуддан чиқиб, баландликка чиқиб, фавқулодда сигналларни ёққан.

Операция бир неча босқичда ўтказилган ва унга махсус кучлар, авиация ва ёрдамчи бўлинмалар жалб қилинган. Ҳарбийлар нафақат қидирув ишларини олиб борган, балки Эрон кучларидан ҳимоя қилишни ҳам таъминлаган. Ҳудудда Ислом инқилоби қўриқчилари корпуси ва “Басиж” бўлинмалари ҳам учувчини ушлаш мақсадида фаол ҳаракат қилган. Шу билан бирга, америкалик кучлар рақибни орқада қолдириб, муваффақиятли эвакуацияни амалга оширган.

Интернетда Эрон кучларига қарши зарбаларни тасвирловчи видеолар тарқалган. Уларда жароҳатланган ва ҳалок бўлганлар кўрсатилгани айтилади, аммо расмий тасдиқ йўқ.

Қутқарув операцияси Эрон ҳудудининг чуқур қисмида ўтказилганлиги сабабли, иштирокчилар учун вазифа жуда мураккаб ва хавфли бўлган. Шу билан бирга, манбалар маълумотига кўра, америкалик ҳарбийлар йўқотишларсиз операцияни якунлаган.

Эслатиб ўтамиз, аввалроқ Эрон мамлакат ҳаво ҳужумидан мудофаа тизимлари A-10 Thunderbolt II самолётини Ҳормуз бўғози яқинида уриб туширгани ҳақида хабар берилганди. Самолёт уриб туширилгач, Форс кўрфази сувларига қулаган.