Хитой Эронга қурол сотмасликка ваъда берди – Трамп

АҚШ Президенти Дональд Трамп Хитой Халқ Республикаси Раиси Си Цзиньпин Эронни қурол-яроғ билан таъминламасликка ваъда берганини айтди. Бу ҳақда Трамп бугун, 14 май куни “Fox News”га берган интервьюсида сўз очди.

“У [Эронга] қурол-яроғ етказиб бермаслигини айтди”, дейди Трамп. 

Унинг қўшимча қилишича, Си Цзиньпин Яқин Шарқдаги низони ҳал қилишда ёрдам таклиф қилган ва агар зарур бўлса, кўмаклашишга тайёрлигини билдирган.

Оқ уйнинг X ижтимоий тармоғидаги хабарига кўра, музокаралар давомида томонлар Теҳрон ядро қуролига эга бўлмаслиги кераклиги ҳамда Ҳормуз бўғози нефть ва газнинг эркин транзити учун очиқ қолиши зарурлиги бўйича ҳам келишувга эришган.

Баёнотда айтилишича, Си Цзиньпин бўғозни ҳарбийлаштиришга ва унинг ишлатилишини чеклашга қаратилган ҳар қандай уринишларга қарши чиққан. Шунингдек, у Хитойнинг ушбу минтақа орқали ўтувчи йўналишларга қарамлигини камайтириш мақсадида Америка нефти харидини кўпайтиришдан манфаатдор эканини билдирган.

Бундан ташқари, Оқ уй маълумотларига кўра, қуйидаги масалалар муҳокама қилинган:

• Америка компанияларининг Хитой бозорига киришини кенгайтириш;
• Хитойнинг АҚШ саноатига йўналтирилган инвестицияларини ошириш;
• Америка қишлоқ хўжалиги маҳсулотлари харидини кўпайтириш;
• АҚШга фентанил прекурсорлари оқимини камайтириш бўйича саъй-ҳаракатларни давом эттириш зарурати.

Эслатиб ўтамиз, аввалроқ Дональд Трамп делегация ҳамроҳлигида давлат ташрифи билан Пекинга учиб борган эди. Бу АҚШ раҳбарининг сўнгги тўққиз йил ичидаги ХХРга илк ташрифи ҳисобланади. Маълум бўлишича, АҚШ ва Хитой етакчиларининг Пекиндаги музокаралари икки соатдан кўпроқ давом этган. Трамп ва Си Цзиньпин учрашувининг марказий мавзуси Тайвань атрофидаги вазият бўлган.