Трамп Путин билан телефонда гаплашганини айтди

north_east

Путин ва Трамп музокараси қаерда бўлиши мумкинлиги айтилди

АҚШ Президенти Дональд Трамп Россия Президенти Владимир Путин билан телефон орқали гаплашиб, Россия-Украина урушини тугатиш бўйича музокаралар олиб боришга ҳаракат қилганини айтди. Бу ҳақда Оқ уй раҳбари кеча, 8 февраль куни “The New York Post” газетасига берган интервьюсида маълум қилди.

Уларнинг телефонда неча марта гаплашгани сўралганда, Трамп “Мен бу ҳақда айтмасликни афзал кўраман” деди.

Трампнинг таъкидлашича, Путин жанг майдонидаги ўлимлар ҳақида “ҳақиқатан ҳам қайғуради”.

“У одамларнинг ўлимини тўхтатишни хоҳлайди”, дейди у.

Шунингдек, АҚШ Президенти урушни тугатиш учун “аниқ режаси” борлигини айтди.

“Умид қиламанки, бу тез амалга ошади. Одамлар ҳар куни ҳалок бўлмоқда. Украинадаги бу уруш жуда даҳшатли. Мен бу лаънати урушга чек қўймоқчиман”, деди у.

Дональд Трамп Миллий хавфсизлик бўйича маслаҳатчи Майкл Уолтцга можарони ҳал қилиш бўйича учрашувлар ташкил этишни топширди.

“Келинг, бу учрашувларни ўтказайлик. Улар учрашмоқчи. Одамлар ҳар куни ўляпти, ёш, чиройли аскарлар ҳалок бўлмоқда. Ёш йигитлар, худди ўғилларимга ўхшаш”, деган Трамп интервью бўлиб ўтган Air Force One бортида Уолтцга.

Трамп Украина Президенти Владимир Зеленский билан ҳар қандай потенциал тинчлик келишувида хавфсизлик кафолатлари эвазига Украинадаги ноёб тупроқ минералларига кириш учун 500 миллион долларлик келишувга эришмоқчи эканини айтди. Трампнинг сўзларига кўра, бу келишув газга ҳам таъсир қилади, бироқ у нимани назарда тутганига аниқлик киритмади.

Нашрнинг ёзишича, АҚШ вице-президенти Жеймс Дэвид Вэнс 14-16 февраль кунлари бўлиб ўтадиган Мюнхен хавфсизлик конференциясида Зеленский билан учрашади.

Эслатиб ўтамиз, жорий йилнинг 20 январь куни кечқурун АҚШ Президенти лавозимига киришган Доналд Трамп журналистлар билан суҳбатда агар Россия Президенти Владимир Путин Украинадаги урушни тугатиш бўйича битим тузишдан бош тортса, Россия катта муаммоларга дуч келишини айтганди. Шу билан бирга, АҚШ Президенти Путиннинг ўзи ҳам келишув тузишга мойил, деган фикрни билдирди.