Трамп Россиядаги музокараларни қандай баҳолади?

АҚШ Президенти Дональд Трамп Россия раҳбари Владимир Путиннинг махсус вакил Стив Уиткофф ва Президентнинг куёви Жаред Кушнер билан Москвада ўтказган учрашувни “жуда яхши” деб баҳолади. Бу ҳақда Америка етакчиси кеча, 3 декабрь куни Оқ уйда журналистларнинг саволларига жавоб бериш чоғида айтди.

Маълум қилинишича, Уиткофф ва Кушнер Трамп ва Украина амалдорларини Путин билан “кенг қамровли ва самарали” тарзда ўтган музокаралар ҳақида хабардор қилган. Трампнинг айтишича, улар Москва ҳақиқатан ҳам Украинадаги можарони тугатиш истагида эканини таъкидлаган.

“Уларда Путин урушнинг якунини исташи ҳақидаги тасаввур пайдо бўлган. Менимча, у яна одатий ҳаёт тарзига қайтишни хоҳлаяпти”, деган Оқ уй раҳбари. 

Трампнинг қўшимча қилишича, унинг назарида, Путин Вашингтон билан савдо муносабатларини йўлга қўйишни жангни давом эттиришдан устун қўяди. 

Уиткофф ва Кушнер 2 декабрь куни музокаралар учун Москвага етиб борган. Бу Уиткоффнинг шу йил ичидаги Россияга олтинчи ташрифи бўлиб, ундан олдинги сафари 6 августда – Анкоридждаги Россия–АҚШ саммити олдидан амалга оширилган эди.

Кремлда Россия ва АҚШ ўртасида беш соатга яқин давом этган музокаралар бўлиб ўтди. Россия томонидан Президент ёрдамчиси Юрий Ушаков ва чет эл мамлакатлари билан инвестицион ва иқтисодий ҳамкорлик бўйича президентнинг махсус вакили Кирилл Дмитриев ҳам иштирок этди.

Ушаков учрашувни “жуда фойдали, конструктив ва мазмунли” деб атади. Унинг сўзларига кўра, мулоқот Трамп вакиллари ундан Путинга “саломлар ва энг яхши тилаклар”ни етказиши билан бошланган. Путин ҳам Трампга дўстона саломлар ва бир қатор муҳим сиёсий сигналларни етказишни сўраган.

Президент ёрдамчисининг маълум қилишича, Путин Уиткофф ва Кушнер билан ҳудудларга оид масалаларни муҳокама қилган, бу ҳудудларсиз Россия инқирознинг ечимини кўрмаётганини таъкидлаган. Шунингдек, Москва ва Вашингтон ўртасидаги келгуси иқтисодий ҳамкорликнинг “катта истиқболлари” ҳам кўриб чиқилган. Ҳудудий масалада тарафлар якуний қарорга кела олмаган, бироқ музокараларнинг мазмуни ошкор этилмаслиги ҳақида келишиб олинган.