Трамп Си Цзиньпинни АҚШга таклиф қилди. Раис рози бўлди

Хитой Халқ Республикаси Раиси Си Цзиньпин жорий йилнинг кузида давлат ташрифи билан АҚШда бўлади. Бу ҳақда бугун, 15 май куни Хитой Ташқи ишлар вазири Ван И маълум қилди.

“Президент Трампнинг таклифига биноан Раис Си Цзиньпин шу йилнинг кузида давлат ташрифи билан АҚШга боради”, дейди Ван И.

Хитой ТИВ раҳбарининг сўзларига кўра, томонлар “Хитой ва АҚШ ўртасидаги конструктив ва стратегик барқарор муносабатлар”нинг янги формати бўйича келишиб олган. Ван И Пекин ва Вашингтон савдо, дипломатия, ҳарбий соҳа, соғлиқни сақлаш, қишлоқ хўжалиги ва гуманитар алмашинувлар йўналишида ҳамкорликни кенгайтириш истагида эканини таъкидлаган.

Маълумот учун, Си Цзиньпин охирги марта АҚШга 2023 йилнинг ноябрь ойида борган эди. Ўшанда у Сан-Франциско шаҳрида бўлиб ўтган Осиё-Тинч океани иқтисодий ҳамкорлиги (APEC) саммитида иштирок этган ва саммит доирасида АҚШнинг ўша вақтдаги президенти Жо Байден билан учрашган. Агар расмий давлат ташрифи ва Оқ уйга ташриф назарда тутилса, бу анча аввал – 2015 йилнинг сентябрь ойида, Барак Обама президентлиги даврида амалга оширилган. Шу йилнинг кузига режалаштирилаётган ташриф Си Цзиньпиннинг сўнгги 3 йил ичида АҚШга илк сафари, Оқ уйга эса охирги 11 йилдаги биринчи давлат ташрифи бўлади.

Эслатиб ўтамиз, Трамп 13 май куни Хитойга етиб борган эди. Бу унинг 2017 йилдан бери ХХРга илк ташрифи бўлди. Икки етакчининг дастлабки музокаралари 14 май куни бўлиб ўтди ва икки соатдан кўпроқ давом этди. Трамп ва Си Вашингтон ҳамда Теҳрон ўртасидаги низони, савдо чекловларини, шунингдек, Тайвань масаласини муҳокама қилди. Трампнинг Хитойга ташрифининг учинчи куни – бугун, 15 майда давлат раҳбарлари Си Цзиньпиннинг давлат қароргоҳида учрашди. Учрашувдан сўнг Трамп томонлар “фантастик савдо битимлари”ни имзолаганини эълон қилди.