Трамп Уиткофф ва Кушнернинг Покистонга сафарини бекор қилди – ОАВ

АҚШ Президенти Дональд Трамп ўзининг махсус вакили Стив Уиткофф ва куёви Жаред Кушнернинг Покистонга сафарини бекор қилишга қарор қилди. Улар Эрон билан музокаралар ўтказиш керак эди. Бу ҳақда давлат раҳбари “Fox News” телеканали журналисти Ойша Ҳасни билан телефон орқали суҳбатда маълум қилган.

“Бироз олдин одамларим йўлга чиқишга ҳозирлик кўраётганда, уларга шундай дедим: “Йўқ, сизлар у ерга етиб бориш учун 18 соатлик парвозни амалга оширмайсиз. Барча қарталар бизнинг қўлимизда. Улар (Эрон томони) хоҳлаган вақтларида бизга қўнғироқ қилишлари мумкин. Аммо сизлар энди ҳеч нарса ҳақидаги суҳбатлар учун 18 соатлаб учмайсиз”, дея Америка етакчисининг сўзларидан иқтибос келтирган Ҳасни.

Маълумот учун, бугун, 25 апрель куни Исломободга борган Эрон Ташқи ишлар вазири Аббос Ароқчи Покистон расмийлари билан АҚШ билан бўлган можарони ҳал қилиш масаласини муҳокама қилди.

Шу куннинг ўзида “Axios” портали журналисти Барак Равид хабардор манбаларга таяниб, Уиткофф ва Кушнер 27 апрель куни Покистон пойтахтида Эрон ТИВ раҳбари билан учрашиши мумкинлиги ҳақида хабар берди.

Эслатиб ўтамиз, Теҳрон ва Вашингтон ўртасидаги музокараларнинг биринчи раунди жорий йилнинг 11 апрель куни бўлиб ўтган эди. Ўшанда Трамп Эрон билан икки ҳафталик вақтинчалик ўт очишни тўхтатиш бўйича келишувга эришилганини эълон қилганди. Бироқ, эртаси куниёқ АҚШ вице-президенти Жей Ди Вэнс томонлар келишувга эриша олмаганини маълум қилди. Бунга жавобан Трамп Эрон портларига кираётган ва чиқаётган барча кемалар учун денгиз блокадасини жорий этди.