Трамп Зеленскийнинг таклифига кўнди

АҚШ Президенти Дональд Трамп Россия Президенти Владимир Путин ва Украина Президенти Владимир Зеленский билан уч томонлама учрашувда иштирок этишга тайёрлигини билдирди. Бу ҳақда у бугун, 28 май куни Оқ уйда журналистлар билан суҳбатда сўз очди.

АҚШ Президентидан уч томонлама учрашувнинг эҳтимоли ҳақида сўралганда, “агар бу зарур бўлса – бўлсин”, дея жавоб берган.

У, шунингдек, Оқ уй ҳозирда АҚШ ва Россия Президентларининг шахсий учрашувини ташкил этиш устида ишлаётгани ҳақида ҳам гапирган. 

“Ҳозирда биз Президент Путин билан учрашув устида ишлаяпмиз. Вазият қандай кечаётганини кўрамиз. Менимча, ҳаммаси яхши, лекин кўрамиз”, дея қўшимча қилган у.

Қайд этиш жоиж, 23 май куни Украина Ташқи ишлар вазири Андрей Сибига Украина ва Россия Президентлари – Владимир Зеленский ва Владимир Путин ўртасида юқори даражадаги учрашувни ташкил этиш устида иш олиб борилаётганини маълум қилган. Россия Президентининг матбуот котиби Дмитрий Песков эса, агар икки мамлакат музокарачилари муайян келишувларга эришса, Президент Путин Зеленский билан учрашиши мумкинлигини билдирган. Бироқ қандай келишувлар назарда тутилаётгани очиқланмаган.

Эслатиб ўтамиз, кеча, 27 май куни Украина Президенти Владимир Зеленский Россия Президенти Владимир Путин ва АҚШ Президенти Дональд Трамп иштирокида уч томонлама учрашув ўтказишни таклиф қилганди. Зеленскийга кўра, АҚШ Россияга қарши санкцияларни кучайтириши керак.