Turkiya Hormuzni minalardan tozalashda ishtirok etishi mumkin

Turkiya Tashqi ishlar vaziri Hoqon Fidan AQSH va Eron o‘rtasida tinchlik kelishuvi tuzilsa, Anqara Hormuz bo‘g‘ozida minalarni tozalash ishlarida ishtirok etishi mumkinligini ma’lum qildi. Bu haqda u bugun, 25 aprel kuni Buyuk Britaniyaga rasmiy tashrifi doirasida OAVga bergan bayonotida so‘z yuritdi.

U Oksford universitetidagi tadbirdan so‘ng jurnalistlar bilan suhbatda Turkiya mojaro tugagandan keyingi vaziyatda minalarni tozalash kabi texnik va insonparvarlik ishlariga qarshi emasligini ta’kidlagan.

“Aytaylik, Eron va amerikaliklar o‘zaro kelishuvga erishdi, natijada tinchlik o‘rnatildi. U yerga koalitsiya borib, texnik ishlarni amalga oshiradi va minalarni tozalaydi. Bunda hech qanday muammo yo‘q. Milliy mudofaa vazirligimizga Prezidentimiz tomonidan tegishli topshiriq berilgan. Biroq, agar qayta boshlanishi mumkin bo‘lgan urushda bizning o‘z sezgir jihatlarimiz bor va bunday vaziyatda biz boshqacha pozitsiyada bo‘lamiz”, degan Fidan.

Shuningdek, u Hormuz bo‘g‘ozi bo‘yicha ikki ehtimoliy holat haqida ma’lumot bergan. Birinchisi – muzokaralar orqali kelishuvga erishilib, dengiz yo‘llari hech qanday cheklov va qo‘shimcha to‘lovlarsiz erkin harakat uchun ochiq bo‘lib qoladi. Ikkinchisi – agar muzokaralar natija bermay, urush davom etsa yoki yangi muammolar yuzaga kelsa, unda bo‘g‘ozdagi muammoli hududlarni qanday hal qilish masalasi kun tartibiga chiqadi.

“Bunday vaziyatda Hormuz bo‘g‘ozidagi muammoli hududlarni aniqlash degan tushuncha paydo bo‘ladi. Bu masalaning ba’zi jihatlari bizning tashqi siyosatimizga mos keladi, ba’zilari esa mos kelmaydi. Prezidentimiz bu borada aniq pozitsiyaga ega”, deydi u.

Eslatib o‘tamiz, avvalroq AQSHning maxsus vakillari Stiv Uitkoff va Jared Kushner joriy yilning 27 aprel kuni Pokistonning Islomobod shahrida Eron Tashqi ishlar vaziri Abbos Aroqchi bilan uchrashishi mumkinligi xabar qilingandi.