Туркия Россия нефтини сотиб олишни тўхтатишдан бош тортди

Туркия Россия нефтини сотиб олишни тўхтатмайди. Бу ҳақда Туркия Энергетика вазири Алпарслон Байрактар CNN Turk телеканалига берган интервьюсида маълум қилди.

У АҚШнинг Россия нефтини сотиб олмаслик ҳақидаги талаби фонида бу борадаги қарорларни одатда Россия нефтини харид қиладиган Туркиянинг хусусий компаниялари қабул қилишини билдирди.

“Ҳозиргача бу масалада қарорларни хусусий секторнинг ўзи қабул қилиб келган. Чунки бу тижорий қарорлардир. Яъни биз ҳеч қачон ҳеч кимга: “Мана бу ердан сотиб ол, у ердан олма”, деб айтмаганмиз. Ҳозиргача бундай қилмаганмиз. Улар ҳам ўз етказиб берувчиларини ва фаолият йўналишларини ўз тижорий манфаатларидан келиб чиқиб танлаб келишган. Аслида бу хусусий компаниялар, дистрибьюторлар ва нефтни қайта ишлаш заводларининг қароридир”, дейди Туркия Энергетика вазири.

Унинг сўзларига кўра, Туркиядаги нефтни қайта ишлаш заводлари яқин манбалардан олинадиган нефть хомашёсини қайта ишлаш учун қурилган, шу сабабли Россиядан импорт техник ва молиявий жиҳатдан зарур. Алпарслон Байроқдор, шунингдек, қиш ойлари яқинлашаётгани сабабли Туркия газ етказиб беришни “ҳеч қандай камчиликсиз” турли манбалардан таъминлаши кераклигини айтган.

“Биз Россия, Озарбайжон, Эрон, Туркманистондан – имкон бор жойнинг барчасидан газ сотиб олишимиз керак”, дейди у.

Эслатиб ўтамиз, аввалроқ АҚШ Президенти Дональд Трамп Оқ уйда Туркия Президенти Ражаб Тойиб Эрдўған билан учрашувда ундан Россия нефтини сотиб олишни чеклашни сўрагани ҳақида хабар берилган эди.