Туркияда ИШИД билан тўқнашувда 3 полициячи ҳалок бўлди (видео)

Бугун, 29 декабрга ўтар кечаси Туркиянинг шимоли-ғарбида, Ялова вилоятида полиция билан ИШИД жангарилари ўртасида отишма юз берди. Оқибатда уч нафар полициячи ва олти нафар жангари ҳалок бўлди, яна саккиз нафар полиция ходими ҳамда бир нафар қўриқчи жароҳат олди. Бу ҳақда Туркия Ички ишлар вазири Али Ерлиқоя маълум қилди.  

Қайд этилишича, отишма полиция террорчиликда гумон қилинаётганлар яширинган уйга бостириб кирган пайтда бошланган. Полицияга Бурса вилоятидан махсус бўлинма ёрдамга чақирилган. Бинода беш нафар аёл ва олти нафар бола бўлган, улардан ҳеч ким жабрланмаган, барчаси хавфсиз тарзда эвакуация қилинган. Махсус операция маҳаллий вақт билан тахминан тунги соат 2:00 да бошланган ва 9:40 да якунланган. Ички ишлар вазирлиги маълумотига кўра, отишмада иштирок этган барча жангарилар Туркия фуқаролари бўлган.

Ички ишлар вазири Али Ерлиқоя бу ИШИДнинг эҳтимолий кучларига қарши Туркиянинг 15 вилоятида бир вақтнинг ўзида ўтказилган юздан ортиқ аксилтеррор рейдларидан бири бўлганини маълум қилган.

Маълумот учун, сўнгги йилларда ИШИД Туркияда бир қатор терактлар содир этган, жумладан 2017 йил 1 январь – Янги йил кечасида Истанбулдаги тунги клубда амалга оширилган отишмада 39 киши ҳалок бўлган, шунингдек 2016 йилда Отатурк номидаги аэропортга уюштирилган ҳужумда 45 киши ҳаётдан кўз юмган.

Эслатиб ўтамиз, аввалроқ Туркия расмийлари мамлакатда Рождество ва Янги йил байрамлари пайтида ҳужумлар уюштиришни режалаштирганликда гумон қилинган 115 нафар “Исломий давлат” (ИШИД) террор гуруҳи аъзосини ҳибсга олганди.