Учаётган самолёт эшигини очмоқчи бўлган йўловчи ҳибсга олинди

Кеча, 11 декабрь куни Гонконг полицияси Cathay Pacific авиакомпаниясининг CX811 рейсида содир бўлган ҳодиса юзасидан йўловчини ҳибсга олди. Бу ҳақда “Reuters” хабар берди.

Маълум қилинишича, 10 декабрь куни Бостондан Гонконгга учаётган рейс парвози пайтида бир йўловчи самолёт эшигини очишга уринган. Ходимларнинг тезкор хатти-ҳаракати туфайли йўловчи ушлаб қолинган. Ҳодиса оқибатида ҳеч ким жабрланмаган. 

“Аэронавигация ходимимиз вазиятни дарҳол пайқади, эшикнинг тўлиқ ёпиқлиги ва хавфсизлигини текширди ва ҳодиса ҳақида тегишли идоралар ҳамда полицияга хабар берди”, деди Cathay Pacific авиакомпания масъул ходими. 

Унинг қўшимча қилишича, мижозлар ва экипаж хавфсизлиги авиакомпания қарорларининг асосий мезони ҳисобланади.

Гонконг полицияси воқеани тасдиқлаб, Хитой материк қисмидан бўлган 20 ёшли эркакнинг Авиация хавфсизлиги тўғрисидаги қонунни бузганликда гумон қилинган ҳолда 10 декабрь куни эрта тонгда ҳибсга олинганини маълум қилди. Ҳозирда Гонконг полицияси воқеа тафсилотларини ўрганишни давом эттирмоқда.

Эслатиб ўтамиз, аввалроқ Австралия Бош вазирининг самолёти АҚШга фавқулодда қўнгани ҳақида хабар берилганди. Экипаж аъзоси устига буюм тушиб кетиши оқибатида жароҳат олган. Жабрланувчи шифохонага ётқизилган ва самолёт ёқилғи қуйилганидан сўнг Австралияга учиб кетган.