Ўзбекистон FIFA рейтингида қанча балл йўқотди?

Ўзбекистон миллий терма жамоаси Нидерландияга қарши ўтказилган ўртоқлик учрашувидаги мағлубиятдан сўнг FIFA рейтингида 2,47 балл йўқотди. Буни FIFA’нинг терма жамоалар рейтинги маълумотларида кўриш мумкин.

Кеча, 8 июнь куни бўлиб ўтган баҳсда “оқ бўрилар” Нидерландия терма жамоасига қарши ўртоқлик учрашувида мағлубиятга учради. Оқибатда Ўзбекистон терма жамоаси FIFA рейтингида 2,47 очкони йўқотди, бироқ шунга қарамай 50-поғонадаги ўрнини сақлаб қолди.

Маълумот учун, жорий йилнинг 2 июнь куни Фабио Каннаваро шогирдлари Канадага қарши ўйинда ҳам мағлубиятга учраган эди. Ўша учрашувдан сўнг терма жамоа FIFA онлайн рейтинг тизимида 4 очко йўқотган.

Шу тариқа, Ўзбекистон терма жамоаси икки ўртоқлик учрашувидан сўнг жами 6,47 очкони йўқотиб, 1458,73 балл тўплаган ҳолда мундиалга тайёргарликни давом эттирмоқда.

Ҳозирги FIFA рейтингида амалдаги жаҳон чемпиони Аргентина терма жамоаси пешқадамлик қилмоқда. Ундан кейинги ўринни Европа чемпиони Испания эгаллаган бўлса, Дидье Дешам бошчилигидаги Франция терма жамоаси кучли учликни якунлаб турибди.

FIFA миллий терма жамоаларнинг янгиланган рейтинги жорий йилнинг 11 июнь куни расман эълон қилинади.