Венесуэла ҳозир жуда бахтли – Трамп

АҚШ Президенти Дональд Трамп Венесуэла унинг аралашувидан кейин “бахтли давлат”га айланганини айтди. Бу ҳақда у CBS каналига берган интервьюсида сўз очди.

Трамп АҚШ Венесуэладаги вазиятга аралашгандан сўнг мамлакат “жуда бахтли давлат”га айланганини даъво қилган. Унинг сўзларига кўра, 2026 йил январида Николас Мадуро ҳибсга олинганидан кейин вазият кескин яхшиланган.

“Улар бахтсиз эди, лекин энди ҳамма нарса жойида эканлигидан, ҳамма нарса яхши бошқарилаётганидан хурсандлар. Нефть қазиб олиш жуда катта, узоқ йиллардаги энг катта кўрсаткич. Йирик нефть компаниялари сиз кўрган энг катта, энг чиройли бурғулаш қурилмаларини қурмоқда ва одамлар ишламоқда, қисқаси, Венесуэла бахтли мамлакат. Одамлар менга Венесуэлада содир бўлган воқеалардан жуда фахрланишларини ва улар яхши иш қилаётганликларини айтмоқда. Шундай қилиб, бизда қилган ва давом эттираётган жуда кўп қизиқарли нарсалар бор”, деган Трамп.

Бироқ, мустақил кузатувчиларнинг маълумотларига кўра, Венесуэлада иқтисодий ҳолат ҳануз оғирлигича қолмоқда. Қашшоқлик даражаси пасаймаган, инфляция эса юқори даражада сақланиб турибди. Мутахассислар айрим иқтисодий ўсиш кўрсаткичлари бўлса ҳам, бу оддий аҳоли фаровонлигига сезиларли таъсир қилмаганини айтмоқда.

Эслатиб ўтамиз, аввалроқ АҚШ Венесуэладаги элчихонаси фаолиятини қайтадан тиклаши ҳақида хбаар берилганди.