Япония фавқулодда нефть захираларидан фойдаланишни бошлади

Эрон уруши сабаб глобал энергетика инқирози кучайиб бораётган бир пайтда Япония фавқулодда нефть захираларидан фойдаланишни бошлади. Бу ҳақда “Al Jazeera” хабар берди. 

Маълум қилинишича, Япония Бош вазири Санаэ Такаичи ўтган ҳафта Эроннинг Ҳормуз бўғозидаги кемаларга таҳдидлари туфайли нефть таъминотида муаммолар юзага келиши мумкинлигини айтиб, захирадаги 80 миллион баррель нефтни чиқариш режасини эълон қилган.

Ушбу қарор Халқаро Энергетика Агентлиги ҳам глобал бозордаги вазиятни юмшатиш мақсадида рекорд даражада – 400 миллион баррель нефть чиқаришни мувофиқлаштиришини маълум қилган пайтга тўғри келди.

Таҳлилчиларга кўра, одатда дунё нефть таъминотининг қарийб бешдан бир қисми ўтадиган Ҳормуз бўғози орқали юк ташиш деярли тўхтаб қолган. Шу сабабли нефть нархлари кескин ошмоқда. 

Сўнгги ҳафтада нефть нархи бир неча бор баррелига 100 доллардан ошди. Брент маркали нефть нархи жорий йилнинг 28 февралида уруш бошланганидан буён бир неча фоизга кўтарилиб, бугун, 16 март ҳолатига кўра бир баррель учун 104,85 долларни ташкил этди.

Шу билан бирга, АҚШ Президенти Дональд Трамп бошқа давлатларни Ҳормуз бўғозини очишга ёрдам беришга чақирган. Бироқ, Токио ҳозирча бу ҳудудга ўз ҳарбий кемаларини юбориш режаси йўқлигини билдирган.

Маълумот учун, Япония дунёдаги энг йирик нефть импортчиларидан бири бўлиб, мамлакат энергия эҳтиёжининг қарийб 80 фоизини хориждан келтириладиган қазилма ёқилғилар ҳисобига қоплайди.

Эслатиб ўтамиз, аввалроқ Ҳормуз бўғози ҳудудида учта фуқаролик кемаси ўққа тутилгани ҳақида хабар берилганди.