Зеленский АҚШ вакилларига ишонмаслигини айтди

Украина Президенти Владимир Зеленскийга Женевада Россия билан музокаралар бошланишидан олдин АҚШ Президентининг махсус вакили Стив Уиткофф ҳамда Жаред Кушнер Россия ҳақиқатан ҳам жангларни тугатишни истаётганини айтган. Бу ҳақда Зеленский “Axios” нашрига берган интервьюсида сўз очган.

Уиткофф ва Кушнер Зеленскийга шу маълумотдан келиб чиқиб, уч томонлама учрашувда Украина делегацияси фаолиятини мувофиқлаштиришни тавсия қилган. Бироқ, Зеленский бу масалада анча пессимистик кайфиятда эканини айтган ва улардан уни бу фикрга ишонтиришга уринмасликни сўраган.

Зеленский, шунингдек, Дональд Трампнинг Украина муайян ён беришларга бориши кераклиги ҳақидаги сўзларига ҳам изоҳ берган. У: “Бу қарор эмас, балки музокара тактикаси бўлишига умид қиламан”, деган.

Украина Президентининг таъкидлашича, Донбассдан бир томонлама қўшин чиқариш ёки ҳудудларни Россияга беришни назарда тутувчи тинчлик келишуви украиналиклар томонидан қабул қилинмайди. Унинг фикрича, бундай қарорни халқ кечирмайди. Шу билан бирга, агар келишувда мавжуд фронт чизиғида қолиш назарда тутилса, бундай ҳужжат референдумда қўллаб-қувватланиши мумкин.

Зеленский ҳудудий масалаларда ютуққа эришишнинг энг яхши йўли – Владимир Путин билан шахсий учрашув ўтказиш, деб ҳисоблайди. У жамоасига келгусида Женевада етакчилар даражасида учрашув ташкил этиш топшириғи берганини маълум қилган.

Путин аввалроқ Зеленскийни Москвага таклиф қилган, бу илтимосни Трамп билдирганини айтган эди. Зеленский эса Москва ёки Минскда учрашиш имкониятини рад этган.

Эслатиб ўтамиз, Женевадаги музокараларнинг биринчи куни олти соат давом этган ва 18 февраль куни давом эттирилиши режалаштирилганди. Манбаларга кўра, учрашувлар жуда кескин руҳда ўтган ва икки томонлама ҳамда уч томонлама форматларда ташкил этилган.