Зеленский Трампнинг куёви билан гаплашди

Украина Президенти Владимир Зеленский АҚШ Президенти Дональд Трампнинг махсус вакили Стив Уиткофф ва Трампнинг куёви Жаред Кушнер билан узоқ ва “мазмунли” телефон суҳбати ўтказди. Бу ҳақда у кеча, 6 декабрь куни ижтимоий тармоқлардаги саҳифаларида маълум қилди.

“Украина чинaкам тинчликка эришиш учун америкалик ҳамкорлар билан самимий ва масъулиятли ишни давом эттиришга қатъий бел боғлаган. Биз АҚШ билан музокараларнинг кейинги қадамлари ва форматлари бўйича келишиб олдик”, деди Зеленский Х ижтимоий тармоғида.

Уиткофф ва Кушнер шу ҳафта Майамида Украина етакчи музокарачиси Рустам Умаров билан икки кунлик музокаралар ўтказди. Иккала томон ҳам буни “Украинада барқарор ва адолатли тинчликка олиб борувчи ишончли йўлни илгари суриш бўйича конструктив муҳокамалар” деб баҳолаган.

Режага кўра, Уиткофф Москвада Россия Президенти Владимир Путин билан ўтказган учрашуви ҳақида Умаровга маълумот бериши керак эди. Зеленский айтишича, у Умаровдан Киевда батафсил ҳисобот кутяпти.

“Ҳамма нарсани телефон орқали муҳокама қилиб бўлмайди, шу боис ғоя ва таклифлар устида жамоаларимиз билан яқиндан ишлашимиз керак. Биз учун асосий тамойил – ҳар бир қадам амалий бўлиши шарт: тинчлик, хавфсизлик ва тикланиш бўйича ҳар бир муҳим чора иш берадиган ва амалга ошириладиган бўлиши керак”, деди у.