Жалолиддин Машарипов операция қилинди

Ўзбекистон миллий терма жамоаси етакчиси, Эроннинг “Истиқлол” клуби футболчиси Жалолиддин Машарипов жароҳати сабабли жарроҳлик амалиётини бошдан ўтказди. Бу ҳақда клуб матбуот хизмати хабар берди. 

“Жалолиддин Машарипов жароҳатдан сўнг даволаниш учун чет элга юборилди ва операция қилинди. Машариповга соғлик ва майдонга ажойиб қайтишни тилаб қоламиз”, дейилади форс клуби расмий баёнотида.

Маълумот учун, Жалолиддин Машарипов терма жамоа сафида охирги мартта 2025 йилнинг 10 июнь куни Қатар билан бўлиб ўтган Жаҳон чемпионати саралашининг сўнги учрашувида майдонга тушган эди. Шундан сўнг Машарипов терма жамоа билан CAFA Nations Cup турнири ва кузги халқаро танаффус пайтидаги терма жамоа йиғинларини ўтказиб юборган.

Эслатиб ўтамиз, аввалроқ Ўзбекистон миллий терма жамоаси ҳимоячиси, Туркиянинг “Ризеспор” клуби аъзоси Ҳусниддин Алиқуловнинг “Гёзтепе” билан ўйинда олган жароҳати жиддий бўлиб чиққанлиги ва операция қилиниши ҳақида хабар берилган эди.