Жиззахда 30 га яқин хонадонни сув босди (видео)

Бугун, 14 февраль куни Жиззах вилоятининг Фориш туманидаги кўплаб хонадонларни сув босди. Бу ҳақда Фавқулодда вазиятлар вазирлиги хабар берди.

Маълум қилинишича, соат 04:53 да Фориш туманида кузатилган қисқа муддатли кучли ёмғир ёғиши оқибатида “Қизилқум” МФЙ Қизилқум қишлоғидан сел-сувлари оқимлари оқиб ўтиши кузатилган.

Дастлабки маълумотларга кўра, Қизилқум қишлоғининг Эрали кўчасидаги тахминан 30 га яқин аҳоли хонадонларнинг ҳовлиси ва томорқаларига сел-сувлари кириши кузатилган.

Вазият оқибатларини бартараф этишга барча зарур техника ва куч-воситалар жалб этилган. Ҳодиса оқибатида вафот этган ва жароҳат олганлар йўқ.

Қўшимча қилинишича, вазият вилоят ФВБ томонидан тўлиқ назоратга олинган.

Шунингдек, кеча, 13 февраль куни 22:05 да туманнинг Янгиқишлоқ шаҳарчасидан ўтган автомобиль йўлига яшин ҳам тушган. Бу воқеада ҳам ҳеч қандай талофат кузатилмаган.

Ўзгидрометга кўра, кеча, 13 февраль куни Фориш туманининг Янгиқишлоқ метеостанциясида соат 21:04 дан 21:07 гача диаметри 0,7 мм бўлган дўл ёғиб ўтган.

Эслатиб ўтамиз, аввалроқ Жиззах вилоятининг Шароф Рашидов туманига сел келганди.