9 ёшли қизнинг ўлими бўйича ёпилган иш қайта очилди

Қашқадарёда 9 ёшли қизалоқ поликлиникада қилинган осма укол оқибатида вафот этгани айтилмоқда. Марҳуманинг отаси шифокорда қаттиқ норози. Суд-тиббий экспертиза хулосалари ҳам турли хил: бирида қизнинг ўлим сабаби ошқазон билан боғлиқ дейилган бўлса, иккинчисада юрак пароги, учинчисида эса жигар серози қилиб кўрсатилган. Ҳатто ота қизининг соғломлигини исботлаш учун марҳуманинг қабрини очишга ҳам розилигини билдирган. 

Маълум бўлишича, 2025 йил 30 август куни Қашқадарё вилоятининг Касби тумани Қамаши қишлоғида жойлашган 8-сонли поликлиникада шифокорлар томонидан 2016 йилда туғилган Бибиой Зиёдуллаева нотўғри равишда антибиотик осма укол қилиниши оқибатида вафот этган. Бўлиб ўтган воқеалар ҳақида марҳуманинг отаси  Зоҳиджон Баротов таҳририятга мурожат қилди. 

“Бир кун аввал қизим банан еб, унинг устидан сув ичганди. Оз миқдорда кўнгли айниган. Нима учун кўнгли айниганни билиш мақсадида поликлиникага олиб борганмиз.  Уша ерда Эшонқулова Ҳаловат опа деган шифокор мен текшириман деб “проба”, ҳеч нарса  қилмай, осма уколларни улаб ташлаган. Қизим борган пайт соғ-саломат борганди, аммо тиббий муолажалар оқибатида қизимнинг  аҳволи оғирлашиб, организмда кучли аллергик реакция юзага келган. Хуллас туппа-тузук борган қизим хушсиз ҳолатга тушиб қолди.”

Касби тумани ИИБ маълумотига кўра, 2025 йил август куни “Қамаши” маҳалла фуқаролар йиғинида яшовчи вояга етмаган Зиёдуллаева Бибиой Зоҳиджон қизининг туман тиббиёт бирлашмасининг “Жонлантириш” бўлимида вафот этганлиги ҳақидаги хабари келиб тушган.

QALAMPIR.UZ судга оид тиббиёт экспертизаси билан танишди. Суд тиббиёт экспертизасининг 2025 йил 30 августдаги 12-сонли хулосасида марҳума қизалоқ тириклик даврида ЎРВИ, “икки томонлама бронхопневмония, сепсис, септисемия шаклида, сероз-лейкоцитли менингоенсефалит, оралиқ миокардит, гепатит, панкреатит” хилидаги патологиялар билан оғриб келгани қайд этилган. Унинг ўлими шу касалликларнинг асоратланиб кечиши жараёнида ривожланган ўткир юрак қон-томирлар ҳамда полиорганлари етишмовчилигидан рўй бергани қайд этилган. Бироқ марҳуманинг отаси экспертиза хулосасида санаб ўтилган жиддий касалликлар қизалоқда ҳеч қачон кузатилмаганини таъкидламоқда. Унинг сўзларига кўра, мазкур хулосалар воқеани яшириш мақсадида тузилган бўлиши мумкин. 

“Ушбу фожиадан сўнг Ички ишлар органлари ва прокуратурага бир неча бор мурожаат қилдим. Аммо, афсуски, ҳолат холисона ўрганилмади, айбдор шифокорлар жавобгарликка тортилмади”, дейди мурожаатчи. 

Бош прокуратура матбуот котиби Ҳаёт Шамсутдиновнинг QALAMPIR.UZ`га маълумот беришича, мазкур ҳолат юзасидан Касби тумани прокуратураси томонидан терговга қадар текширув ҳаракатлари олиб борилиб, натижасига кўра ўтган йили 30 августда Ўзбекистон Республикаси Жиноят-процессуал кодексининг 83-моддаси (Реабилитация учун асослар) 2-бандига асосан жиноят иши қўзғатишни рад қилиш ҳақида қарор қабул қилинган. Аниқроқ айтганда, бу моддага мувофиқ қизнинг ўлимида ҳеч қандай тиббий хато мавжуд эмас деб кўрсатилган. Бироқ,  жорий йилнинг 2 феврал кунида жиноят иши қўзғатишни рад қилиш ҳақидаги қарор бекор қилинган ва яна бу иш қайтадан бошланган. 

Марҳуманинг отаси айблов қўйган иккинчи томон, яъни шифокор билан боғландик. Унинг маълум қилишича, поликлиникага қиз ўз оёғи билан эмас, оғир аҳволда келган. Қизнинг онаси шифокорга қизалоқда икки-учкундан бери шамоллаш қусиш симптомплари кузатилаётганини айтган. Шифокорнинг айтишича, қизалоққа биринчи тез тиббий ёрдам кўрсатилган. Аммо қизнинг аҳволи яхшиланиш ўрнига оғирлашган. Шундан сўнг қизалоқнинг ота-онаси шифокорнинг руҳсатисиз поликлиникадан қизини олиб чиқиб кетган. Уйда ҳам қизнинг аҳволи яхшиланавермагач тез ёрдам чақиртирилган. Бу вазиятда шифокор ҳам етиб келган. Тез ёрдам қизни туман шифохонасига олиб кетган. Маълум вақтдан сўнг қизалоқнинг ота шифокор билан боғлангандан кейин шифокор манзилга етиб келган. У поликлиникада қизалоққа кўрсатилган тиббий муолажалар ҳақида батафсил маълумот берганини айтди. Шифокорнинг фикрини тасдиқлаш учун ундан расмий ҳужжатларни сўраганимизда, у буларнинг ҳаммаси туман прократурасига бериб юборилганини билдирди.  

Марҳуманинг отаси билан ўтказилган интервюдан сўнг QALAMPIR.UZ тергов жараёнлари тафсилотлари билан танишиш мақсадида яна бош прокуратура матбуот котиби Ҳаёт Шамсутдинов билан боғланди. Маълум қилинишича, ҳозирда тергов ҳаракатлари давом этмоқда.