АҚШда 150 дан ортиқ одам иссиқлик сабаб шифохонага ётқизилди

Шимолий Американинг шарқий ҳудудларида ёзнинг биринчи йирик иссиқлик тўлқини бошланиб, 150 га яқин одам иссиқлик билан боғлиқ касалликлар сабабли шифохонага ётқизилди. Бу ҳақда BBC хабар берди.

Нью-Жерси штатининг Патерсон шаҳрида очиқ ҳавода ўтказилган мактаб битирув маросимида 150 дан ортиқ киши иссиқликдан азият чеккан. Шаҳарнинг мэри Андрей Саег фавқулодда ҳолат эълон қилиб, барча оммавий тадбирларни бекор қилган ҳамда совутиш марказларини очган.

Шимолий Каролинада эса камида 41 киши, жумладан болалар ҳам иссиқликдан касалланган ҳолда тиббий ёрдамга муҳтож бўлган.
Мутахассисларнинг фикрига кўра, иссиқлик ҳаддан ташқари юқори бўлиб, айниқса кечаси ҳаво совимаслиги ҳолатни янада оғирлаштирмоқда. Кўплаб шаҳарларда ҳарорат кечаси ҳам 27 даражадан пастга тушмаяпти.

Нью-Йоркда кеча, 25 июнь куни ҳарорат 38 даражага чиққан – бу 1966 йилдан бери шаҳар тарихидаги энг юқори июнь ҳарорати бўлган.

Шарқий соҳил бўйлаб эса энергетика компаниялари аҳолига электр энергиясини тежашни сўрамоқда, чунки миллионлаб одамлар кондиционерларни максимал даражада ишлатмоқда.

Иссиқлик тўлқини ёзнинг бошида келган бўлишига қарамай, кўплаб рекордларни янгилаши мумкин. Мутахассислар эса бундай об-ҳавонинг давомийлиги ва кучи соғлиқ учун жиддий хавф солаётганини таъкидламоқда.

Эслатиб ўтамиз, аввалроқ жорий йилнинг ёз ойларида Япония пойтахти Токио шаҳри аҳолисига сув учун олинадиган асосий коммунал тўловлар бекор қилиниши ҳақида хабар берилганди. Ушбу чора экстремал иссиқликнинг салбий таъсирини камайтириш мақсадида амалга оширилиши кўзда тутилган.