Россия энди урушга борган мигрантларни депортация қилишни тўхтатмоқчи

Россия Мудофаа вазирлиги билан Украинадаги урушда иштирок этиш учун шартнома тузган чет элликлар ватанига экстрадиция қилинмайди. Тегишли ўзгартиришлар ҳукумат комиссияси томонидан қабул қилинди. Бу ҳақда “Ведомости” хабар берди.

Қайд этилишича, чет элликларни ўз мамлакатларида жиноий жавобгарликка тортилишдан ҳимоя қилиш мақсадида шундай чора кўрилмоқда. Давлат Думасида ҳозирда учта қонун лойиҳаси кўриб чиқилмоқда. Улар Россия армиясида ёки ҳарбий тузилмаларда хизмат қилган, шунингдек, шартнома асосида жангларда иштирок этган чет элликлар ҳамда фуқаролиги бўлмаган шахсларга тегишли.

Ўзгартиришларга кўра, бундай шахслар маъмурий депортация қилинмайди. Бунинг ўрнига улар 1000 дан 50 000 рублгача жаримага тортилади ёки 200 соатгача жамоат ишларига ҳукм қилинади. 

Шунингдек, чет эллик фуқароларнинг ҳуқуқий ҳолати тўғрисидаги қонунга қўшимча киритилмоқда. Унга кўра, “2022 йил 24 февралдан кейин” қабул қилинган депортация, реадмиссия, киришни тақиқлаш, вақтинчалик яшаш муддатини қисқартириш ва “ВНЖ”ни (яшаш учун рухсатнома) бекор қилиш ҳақидаги қарорлар “ўз кучини йўқотади ва ижро этилмайди”. Худди шу нарса патентлар ва иш рухсатномаларини бериш ёки янгилашдан бош тортиш ёки ушбу ҳужжатларни бекор қилиш учун ҳам амал қилади.

Давлат Думаси депутати Алексей Куриннийнинг таъкидлашича, ҳукумат маъқуллаган қонун лойиҳалари пакети Украинага қарши жанг қилаётган чет элликлар учун қўшимча рағбат бўлади.

“Чунки бугун “махсус ҳарбий операция”да қатнашаётган, жанговар вазифаларни бажараётган шахсни... умуман олганда, депортация қилиш ва бошқа чет давлатларнинг адлия тизимларига топшириш тасаввурга сиғмайдиган нарса”, дейди у.

Куринний МДҲ давлатлари, жумладан, Тожикистон, Қирғизистон ва Қозоғистонда судлар Украинага қарши жанг қилган ўз фуқароларига ёлланма аскарлик моддаси бўйича ҳукм чиқарган ҳолатларни эслатди.

Эслатиб ўтамиз, аввалроқ Украина Мудофаа вазирлиги ва Бош разведка бошқармаси кўмагида ташкил этилган “Хочу жить” (“Яшашни хоҳлайман”) лойиҳаси Украинага қарши урушда қатнашиш учун Россия Қуролли кучлари сафида ёлланиб, ҳалок бўлган ёки бедарак йўқолган 481 нафар Ўзбекистон фуқаросининг исм-шарифини эълон қилганди.