Самарқандда янги синагога қурилмоқда (видео)

Самарқанд шаҳрида синагога қурилиши бошлангани ҳақида хабарлар тарқалмоқда. Унга илова қилинган видеолардан кўринишича, ибодатхона қурилишига старт бериш учун шахсан асли самарқандлик бўлган олмос магнати Лев Леваев келган. У ўн беш ёшга тўлганида оиласи билан Ўзбекистондан Исроилга кўчиб кетган, кейинчалик фаолиятини Лондонда давом эттирган. Леваевнинг Исроилга кўчиб кетишига ўша вақтда Тошкент шаҳар прокурори лавозимида ишлаган Бурҳон Усмонов (Алишер Усмоновнинг отаси) ёрдам бергани айтилади.

Мутасаддиларнинг QALAMPIR.UZ'га маълум қилишича, эски синагога биноси авария ҳолатида бўлган, яъни у одамлар ҳаёти учун хавф туғдиргани сабабли бузилган ва ўрнида янгиси барпо этилмоқда.

Самарқанддаги бу синагога биноси кўп асрлик тарихга эга бўлган ёдгорлик ҳисобланмайди. Унинг реконструкцияси учун барча зарурий ҳужжатлар мавжуд экани, янги барпо этилаётган синагогада музей, яҳудийликда диний покланиш учун мўлжалланган махсус сув ҳавзаси (миква), шунингдек, ўқув хоналари бўлиши режалаштирилган. Бинода яқинда тамал тоши қўйилган, уни келгуси йилда фойдаланишга топшириш режалаштирилмоқда.

Эслатиб ўтамиз, аввалроқ Ўзбекистондаги исроилликлардан жамоат жойларида яҳудий рамзларни намойиш қилмаслик сўралган эди.