Ўзбекистон Афғонистондан олиб ўтилган вертолётларни қайтаришга рози бўлди – ОАВ

Ўзбекистон 2021 йилнинг августида Афғонистонда амалдаги ҳокимият қулаганида мамлакатдан олиб чиқиб кетилган ҳарбий вертолётларни қайтаришга рози бўлган. Бу ҳақда кеча, 10 сентябрь куни Афғонистондаги “Толибон” муваққат ҳукумати матбуот котиби Забиҳуллоҳ Мужоҳид маълум қилди.

Унинг сўзларига кўра, ўша пайтда Афғонистон ҳарбийлари томонидан олиб чиқилган вертолётлар сўнгги йилларда Ўзбекистон ҳудудида қолиб кетган. Мужоҳиднинг айтишича, уларнинг тақдири Қобул ва Тошкент ўртасида тинч олиб борилган музокаралар мавзуси бўлиб, “Толибон” доимий равишда миллий активларни қайтариш борасидаги кенг саъй-ҳаракатлар доирасида уларни қайтаришни сўраб келган.

“57 ҳарбий вертолётнинг топширилиши яқин орада амалга ошиши кутилмоқда. Бу Афғонистоннинг ҳаво кучларини тиклаш ва икки қўшни давлат ўртасидаги алоқаларни мустаҳкамлаш йўлидаги муҳим қадамлардан бири бўлади”, дейди Мужоҳид.

АҚШ Мудофаа вазирлиги эса 46 та самолёт ва вертолётнинг Ўзбекистонга, яна 18 тасининг Тожикистонга олиб борилганини тасдиқлаган. Бу парвоз воситалари таркибига Ми-17 ва UH-60 вертолётлари, шунингдек, PC-12, C-208, AC-208 ва А-29 русумли қанотли самолётлар кирган.

“Толибон” бир неча бор иккала давлатдан ҳам уларни топширишни талаб қилган, бироқ Тошкент ва Душанбедаги расмийлар бу талаблар юзасидан очиқ изоҳ бермаган.

АҚШнинг Ўзбекистондаги элчиси олдинроқ берган баёнотида янги келишувга кўра, Ўзбекистонга қўнган 46 та учоқ ушбу мамлакат назоратида қолишини айтган. АҚШнинг Афғонистон бўйича элчихонаси эса Тожикистонга собиқ афғон ҳарбий самолётларини “Толибон”га топширмагани учун миннатдорлик билдирган.

Афғонистон собиқ хавфсизлик қўмондонининг айтишича, “Толибон” ҳокимиятни қўлга киритишидан аввал АҚШ мамлакат ҳаво кучларини жами 229 та вертолёт – жанговар ва транспорт воситалари билан таъминлаган.