Ўзбекистон U-17 жамоасининг ЖЧ учун тақвими маълум бўлди

Қатар жорий йилнинг ноябрь ойида бўлиб ўтадиган FIFA U-17 Жаҳон чемпионатига мезбонлик қилади. Унда иштирок этадиган Ислом Исмоилов бошчилигидаги Ўзбекистон U-17 терма жамоасининг тақвими аниқ бўлди.

48 та жамоа иштирокида бўлиб ўтадиган кичик мундиалнинг “Ж” гуруҳидан ўрин олган Ўзбекистон ўсмирлар терма жамоаси Жаҳон чемпионатидаги иштирокини жорий йилнинг 5 ноябрь куни Парагвайга қарши учрашув билан бошлайди. Кейинги баҳс 8 ноябрда Ирландияга қарши, гуруҳ босқичининг сўнгги учрашуви эса 11 ноябрь куни Панама ўсмирларига қарши ўтказилади.

Маълумот учун, Қатарда бўлиб ўтадиган мусобақа жорий йилнинг 3-27 ноябрь кунлари ўтказилади. Ўзбекистон U-17 терма жамоаси эса 1 ноябрь куни Доҳа шаҳрига етиб бориши режалаштирилган. Турнирга тайёргарлик кўраётган Исломбек Исмоилов бошқарувидаги Ўзбекистон U-17 терма жамоаси бугун, 29 октябрь куни БААнинг Шаржа шаҳрида Буркина-Фасога қарши назорат учрашувида майдонга тушади. 

Эслатиб ўтамиз, жорий йилнинг 20 апрель куни Саудия Арабистонида ўтказилган 17 ёшгача бўлган футболчилар ўртасида Осиё кубоги финали учрашувида Ўзбекистон ўсмирлар терма жамоаси саудиялик тенгқурларини 2:0 ҳисобида мағлуб этиб, Осиё чемпиони бўлган эди.