COVID-19’ning yangi shtammi O‘zbekistonga ham kirib keladimi?

O‘zbekistonda epidemiologik vaziyat barqarorligi sabab COVID-19’ning “Sikada” deb nomlangan yangi – BA.3.2 shtammi tarqalish ehtimoli past. Bu haqda Sanitariya-epidemiologik osoyishtalik va jamoat salomatligi qo‘mitasi raisining birinchi o‘rinbosari Nurmat Otabekov ma’lum qildi.

Qayd etilishicha, Jahon sog‘liqni saqlash tashkiloti tomonidan hozirgacha AQSH, Gonkong, Mozambik va Buyuk Britaniya kabi 23 ta davlatda ushbu mutatsiya ro‘yxatga olingan.

Otabekovning aytishicha, aslida, BA.3.2 shtammi aniqlanganiga ancha bo‘lgan va u bir xil tezlikda tarqalmasligi bilan xarakterlanadi. Shu bois bu mutatsiyaga 17 yilgacha “uyquga ketishi” mumkin bo‘lgan va uzoq muddat borligini sezdirmaydigan hasharot – sikada nomi berilgan.

Dastlabki o‘rganishlarga ko‘ra, “Sikada” shtammi “Omikron”ga xos, o‘xshash klinik belgilar bilan kechadi. U nafas yo‘llari jarohatlanishi, ya’ni burun bitishi, yo‘tal, tomoqda og‘riq, qizarish, ba’zan hid va ta’m bilmaslik kabi alomatlar bilan namoyon bo‘lishi mumkin.

Mutaxassislar ushbu kasallikka kattalarga nisbatan bolalar ko‘proq chalinayotganini aytmoqda.

“Ma’lumki, pandemiya davrida dunyo aholisining katta qismi COVID-19 ga qarshi emlandi va shu tufayli ularning qaytadan bu kasallikka chalinish ehtimoli juda kam. Ammo avval koronavirus bilan ro‘baro‘ kelmagan, ya’ni organizmida hali xastalikka qarshi antitanachalar shakllanmagan bolalarning bu virusni yuqtirish xavfi mavjud”, deydi Otabekov.

Uning qo‘shimcha qilishicha, surunkali kasalligi bor, nafas yo‘llari xastaliklaridan aziyat chekuvchilar, immuniteti zaif va yoshi katta insonlar ham bu xavfdan yetarli darajada himoyalanmagan.

“O‘zbekiston misolida aytadigan bo‘lsak, mamlakatimizda epidemiologik vaziyat barqaror. Aholida koronavirus shtammiga nisbatan oddiy respirator kasalliklarga bo‘lgani singari munosabat allaqachon shakllangan. Negaki, yurtdoshlarimizning qariyb 80 foizida jamoaviy immunitet vujudga kelgan. Shu ma’noda, dunyoda qayd etilayotgan yangi shtammlar haqida shov-shuvli xabarlar tarqatish to‘g‘ri emas. Xavotirlanish uchun hech qanday asos yo‘q”, deydi Otabekov.