Italiya ketma-ket uchinchi bor Devis Kubogini qo‘lga kiritdi

Kecha, 23 noyabr kuni Italiya terma jamoasi Bolonyada o‘tkazilgan finalda Ispaniyani mag‘lub etib, ketma-ket uchinchi bor Devis Kubogi g‘olibiga aylandi. Matteo Berrettini va Flavio Kobollining ajoyib o‘yini mezbonlarga tarixiy muvaffaqiyat keltirdi.

Dastlabki bahsda Matteo Berrettini ispaniyalik Pablo Karreno Bustani 6:3, 6:4 hisobida yengib, Italiyaning g‘alabaga bo‘lgan yo‘lini ochdi. 29 yoshli tennischi 13 ta eys qayd etib, bor-yo‘g‘i 79 daqiqada zafarga erishdi. Berrettini Devis Kubogida so‘nggi 12 o‘yinida g‘alaba qozonib kelmoqda.

Ikkinchi bahsda Flavio Kobolli sensatsion tarzda o‘zini ko‘rsatdi. U Xaume Munarga qarshi ilk sakkiz o‘yindan yettitasini boy berganiga qaramay, uch setlik kurashda 1:6, 7:6(5), 7:5 hisobida g‘alaba qozondi.

Italiya 2023 va 2024 yillarda Malagada o‘tkazilgan finallarda ham zafar quchgan edi. Endi esa ular Devis Kubogida ketma-ket uch marta chempion bo‘lgan ilk Yevropa davlati sifatida tarixga kirdi. Bunga qadar faqat AQSH (1968–1972) bunday natijaga erishgan edi.

Ispaniya esa 2019 yilda qo‘lga kiritgan so‘nggi chempionlikdan keyin ilk bor finalga chiqdi. Final yo‘lida ispanlar Chexiya va Germaniyani mag‘lub etdi, biroq yakuniy bosqichda Italiya to‘sig‘idan o‘ta olmadi.

Ma’lumot uchun, Italiya bir mavsumda Devis Kubogi va Billi Jin King Kubogini qo‘lga kiritgan Qo‘shma Shtatlar va Avstraliyadan keyin tarixdagi uchinchi davlatga aylandi.