Qirg‘iziston tashqi qarzini bir kunda to‘lay oladi – Japarov

Qirg‘iziston zarurat tug‘ilganda butun tashqi qarzni bir kun ichida so‘ndirish imkoniyatiga ega, biroq buni qilish iqtisodiy jihatdan maqsadga muvofiq emas. Bu haqda bugun, 17 dekabr kuni mamlakat Prezidenti Sadir Japarov Jogorku Keneshdagi nutqida aytib o‘tdi.

Qirg‘iziston rahbari mamlakat iqtisodiyoti barqaror o‘sib borayotganini va tashqi qarz darajasi sezilarli darajada kamayganini qayd etgan. Agar 2020 yilda u yalpi ichki mahsulotning 54 foizini tashkil etgan bo‘lsa, hozirda bu ko‘rsatkich qariyb 25 foizga teng.

“Iqtisodiyot uchun hech qanday xavf yo‘q. Biz tashqi qarzni bir kunda to‘lashimiz mumkin, ammo bu foydali emas – foizlar yuqoriroq bo‘ladi, jarimalar ham ko‘zda tutilgan. 2035 yilga borib avval olingan kreditlar bilan hech qanday muammosiz hisob-kitob qilamiz”, deydi Sadir Japarov.

Prezidentning aytishicha, Qirg‘izistonning oltin-valyuta zaxiralari 8,5 milliard dollardan oshgan, holbuki besh yil avval ular 2 milliard dollardan biroz ko‘proq bo‘lgan.

So‘nggi ma’lumotlarga ko‘ra, Qirg‘izistonning umumiy davlat qarzi 8,6 milliard dollarni tashkil etadi, shundan qariyb 5,2 milliard dollari tashqi qarzga to‘g‘ri keladi.

Eslatib o‘tamiz, avvalroq Sadir Japarov Bishkekda “Altay” shaharchasi qurilishi uchun kapsula qo‘yish marosimidan keyin Birinchi may tumani aholisi bilan uchrashuvda odamlarni provokatsiyalarga berilmaslikka chaqirgandi.