Qirg‘izistonda 34 kg narkotikni O‘zbekistonga olib ketayotganlar ushlandi (video)

Qirg‘izistonning Botken viloyati hududi orqali 34 kg narkotikni O‘zbekistonga olib ketayotganlar qo‘lga olindi. Bu haqda Qirg‘iziston Ichki ishlar vazirligi xabar berdi.

Qayd etilishicha, mazkur jinoyat ishi Qirg‘iziston Respublikasi Jinoyat kodeksining giyohvandlik vositalarini qonunga xilof ravishda tayyorlash va sotish uchun javobgarlikni nazarda tutuvchi 282-moddasi bilan tergov qilinmoqda.

Tergov ma’lumotlariga ko‘ra, huquq-tartibot idoralari xodimlariga 1993 yilda tug‘ilgan fuqaro E.E.Y. keyinchalik sotish maqsadida Tojikistondan Qirg‘izistonga ko‘p miqdorda “gashish” olib kirishni tashkil qilgani haqida ma’lumot kelib tushgan.

Gumonlanuvchi giyohvand moddalarni sotishga urinayotgan vaqtida qo‘lga olingan. Tintuv davomida IIV xodimlari uning yonidan va avtomashinasidan sariq rangli yopishqoq lenta (skotch) bilan o‘ralgan uchta o‘ramni topgan. Musodara qilingan moddaning umumiy vazni taxminan uch kilogrammni tashkil etgan. Keyinchalik, qo‘lga olingan shaxsning yashash joyida o‘tkazilgan tintuv davomida umumiy vazni 31 kilogramm 398 gramm bo‘lgan, ichida giyohvandlik moddasi bo‘lgan yana 31 ta xuddi shunday o‘ram topilgan. Shu tariqa, musodara qilingan giyohvand moddalar partiyasining umumiy vazni 34 kilogramm 448 grammni tashkil etgan.

Hozirgi vaqtda musodara qilingan moddalarning aniq tarkibini belgilash uchun sud-kimyoviy ekspertizasi tayinlangan. Tergov xalqaro narkotrafik kanali mavjudligi to‘g‘risidagi versiyani ko‘rib chiqmoqda. IIV ma’lumotlariga ko‘ra, giyohvand moddalar Tojikistondan Qirg‘iziston orqali O‘zbekistonga olib o‘tilayotgan bo‘lgan.

O‘zbekistonda ham qo‘shimcha tezkor tadbirlar o‘tkazilgan. Natijada O‘zbekiston kuch tuzilmalari 14 kilogramm gashish va bir kilogramm “opiy”ni musodara qilgan hamda ushbu jinoiy guruh faoliyatiga aloqadorlikda gumon qilinayotgan 1995 yilda tug‘ilgan fuqaro X.T.T.ni qo‘lga olgan. Hozirda giyohvand moddalarni yetkazib berish kanalining barcha ishtirokchilari va ularni tashish yo‘nalishlari aniqlanmoqda.

Eslatib o‘tamiz, avvalroq Namangan viloyatining Chust tumanida 517 tup ko‘knorini o‘z uyining tomorqasida yetishtirgan shaxs qo‘lga olingan edi.