Mirziyoyev marhum Ismoil Jo‘rabekovning uyiga borib, oilasiga hamdardlik bildirdi

Atoqli davlat va jamoat arbobi, O‘zbekiston Respublikasi suv xo‘jaligi vazirining maslahatchisi Ismoil Jo‘rabekov joriy yil 28 sentyabr kuni vafot etgan edi. Prezident Shavkat Mirziyoyev bugun, 6 oktyabr kuni ta’ziyali xonadonga tashrif buyurdi. Qur’on tilovat qilinib, duo o‘qildi. Bu haqda Prezident matbuot xizmati xabar berdi.

Davlat rahbari marhumning ezgu ishlarini, Vatanga xizmatlarini yodga oldi.

Ismoil Jo‘rabekov 1931 yil 12 sentyabrda Samarqand shahrida ishchi oilasida tug‘ilgan. Mehnat faoliyati davomida suv xo‘jaligi sohasida mas’ul lavozimlarda mehnat qilib, respublikada irrigatsiya va melioratsiya sohasini rivojlantirishga munosib hissa qo‘shgan. 1985 yilda O‘zbekiston Vazirlar Kengashi raisining birinchi o‘rinbosari etib tayinlandi.

Mustaqillik yillarida Ismoil Jo‘rabekov O‘zbekiston Respublikasi Bosh vazirining birinchi o‘rinbosari, Davlat suv nazorati boshlig‘i, O‘zbekiston Respublikasi Prezidentining Davlat maslahatchisi lavozimlarida ham samarali faoliyat olib bordi.

So‘nggi yillarda Ismoil Jo‘rabekov mo‘’tabar yoshda bo‘lishiga qaramasdan, suv xo‘jaligi vazirining maslahatchisi sifatida xizmat qilib, Yangi O‘zbekistonni barpo etishga qaratilgan keng ko‘lamli islohotlarni amalga oshirishda faol ishtirok etdi.

Davlat va jamoat arbobining xizmatlari munosib baholanib, u “O‘zbekiston Respublikasida xizmat ko‘rsatgan irrigator” faxriy unvoni hamda davlatning bir qator yuksak mukofotlari bilan taqdirlangan edi.

Davlat rahbari marhumning farzandlari va yaqinlariga hamdardlik bildirib, sabr-toqat tiladi. Ular Prezidentga tashrifi va dalda so‘zlari uchun minnatdorlik bildirdi.