Ramos Yevropaga qaytishga tayyorlanmoqda

“Real Madrid” klubining sobiq himoyachisi Serxio Ramos 2026 yilgi Jahon chempionatida ishtirok etish uchun optimal sport formasini saqlab qolishni maqsad qilgan. Shu sababli  Ramos Meksikaning “Monterrey” klubidan ketib, Yevropaga qaytishga tayyorgarlik ko‘rmoqda. Bu haqda “World soccer talk” nashri xabar berdi.

Manbaga ko‘ra, Ramosning Yevropaga qaytishga qaror qilishiga ikki asosiy omil turtki bo‘lgan. Birinchisi uning oilasi Ispaniyaga qaytishni istamoqda. Ikkinchisi esa Ispaniya terma jamoasi bosh murabbiyi Luis de la Fuenteni o‘zining yuqori saviyada o‘ynash qobiliyatiga yana bir bor ishontirish umidi.

Ramosning fikricha, ispancha futbol uslubiga yaqinroq bo‘lgan chempionatda va yuqori darajadagi musobaqalarda muntazam o‘ynash unga terma jamoaga qaytish imkonini beradi. Bu borada Aymerik Lyaportning misoli muhim hisoblanadi. U Saudiya Arabistonini tark etib, Ispaniya federatsiyasi yordamida “Atletik Bilbao”ga qaytganida milliy jamoaga qayta chaqirildi.

Serxio Ramos 2021 yilda Kosovoga qarshi o‘yinda jarohat olganidan beri terma jamoa safida maydonga tushmagan. Shu sababli u Yevro-2020, JCH-2022 yoki Yevro-2024 musobaqalarida ishtirok eta olmadi. Shunga qaramay, Ramosning “Monterrey”dagi davri muvaffaqiyatsiz bo‘lmadi. U klublar o‘rtasidagi jahon chempionatida maydonga tushdi, turnirda gol urdi va o‘zining yuqori darajadagi himoyaviy mahoratini saqlab qolayotganini ko‘rsatdi.

Ma’lumot uchun, Serxio Ramos Ispaniya milliy terma jamoasi bilan 2008 va 2012 yilgi Yevropa chempionatini va 2010 yilgi Jahon Chempionati g‘olibligini qo‘lga kiritgan.