TIV xorijdagi o‘zbekistonliklarga murojaat bilan chiqdi

Yaqin Sharqdagi keskinlik fonida O‘zbekiston Respublikasining chet elda bo‘lib turgan fuqarolariga muhim tavsiyalar berildi. Bu haqda Tashqi ishlar vazirligi murojaat bilan chiqdi.

Xususan, xorijiy davlatlarda bo‘lib turgan hamda safar rejalashtirayotgan fuqarolarga quyidagi umumiy tavsiyalarga amal qilish eslatildi:

1. Rasmiy axborot manbalarini kuzatib borish:

• yashab turgan mamlakat rasmiy idoralari xabarlarini kuzatib borish;
• O‘zbekiston diplomatik vakolatxonalari e’lon qilayotgan ma’lumotlarga e’tibor qaratish.

2. Diplomatik vakolatxonalar bilan aloqada bo‘lish:

• zarur hollarda konsullik hisobiga turish tavsiya etiladi;
• fuqarolar o‘zlari yashayotgan mamlakatdagi elchixona yoki konsullikning aloqa ma’lumotlarini saqlab qo‘yishi zarur.

3. Mahalliy qoidalarga rioya qilish:

• mamlakat qonunchiligiga hurmat bilan yondashish lozim;
• ommaviy tadbirlar va gavjum joylarda ehtiyotkorlikni saqlash kerak.

4. Shaxsiy tayyorgarlik:

• pasport va zarur hujjatlarni tartibli saqlash lozim;
• aloqa vositalarini doim ishlashga tayyor bo‘lishiga e’tibor qaratish kerak.

“Tashqi ishlar vazirligi xorijdagi fuqarolar bilan doimiy aloqada bo‘lib, zarur hollarda konsullik-huquqiy yordam ko‘rsatishga tayyor”, deyiladi xabarda.

Eslatib o‘tamiz, avvalroq O‘zbekistonning Eron va Isroildagi elchixonalari ushbu mamlakatdagi fuqarolarga murojaat bilan chiqqan edi.