Turkiya ilk qit’alararo ballistik raketasini namoyish qildi (video)

Turkiyaning Istanbul shahrida o‘tkazilayotgan SAHA EXPO-2026 ko‘rgazmasida mamlakatning eng ilg‘or harbiy texnologiyalaridan biri – “Yildirimxon” qit’alararo ballistik raketasi ilk bor jamoatchilikka namoyish etildi. Bu haqda “Yeniçağ gazetesi” xabar qildi.

Rasmiy ma’lumotlarga ko‘ra, bu uzun masofali ballistik raketa (ICBM) 6000 kilometrgacha bo‘lgan masofani qamrab olishi bilan ajralib turadi. Mutaxassislar uning imkoniyatlari Turkiyaning mudofaa salohiyatini qit’alararo darajaga olib chiqishi mumkinligini ta’kidlamoqda.

Turkiya Milliy Mudofaa vaziri Yashar Guler raketaning strategik ahamiyatiga to‘xtalib, zarurat tug‘ilganda undan foydalanishdan “tortinmasligini” bildirgan.

Ma’lum qilinishicha, raketa Yevropa, Osiyo va Afrika qit’alarining katta qismini qamrab oluvchi keng strategik masofaga ega. Shuningdek, uning ta’sir zonasi Rossiyaning katta hududlari, Yaqin Sharq, Shimoliy Afrika hamda Xitoy va Hindistonning g‘arbiy qismlarini ham o‘z ichiga oladi.

Texnik jihatdan “Yildirimxon” raketasi gipertovushli tezlikka ega bo‘lib, nishonga yaqinlashganda tovushdan 25 baravar tezroq harakat qilishi mumkin. U mavjud havo mudofaa tizimlarini chetlab o‘tish qobiliyatiga ega qurol sifatida baholanmoqda. Yangi raketa Turkiyaning harbiy texnologik mustaqilligini mustahkamlash va mudofaa sohasidagi kuchini yangi bosqichga olib chiqishga qaratilgani qayd etilmoqda.