Iso Masih tasviri tushirilgan 1300 yillik nonlar topildi

Turkiyada arxeologlar Iso Masih tasviri tushirilgan 1300 yillik non topdi. Bu haqda ATI portali xabar berdi.

Qadimgi Irenopolis shahri joylashgan Topraktepe arxeologik yodgorligida olib borilgan qazishmalar davomida mutaxassislar milodiy VII-VIII asrlarga oid va tabiiy ravishda kuydirilgan holda saqlanib qolgan beshta dumaloq non topdi.

Ularning aksariyatida Malta xochi tasvirlangan, birida Isoning surati va yunon tilida: “Muborak Isoga minnatdorlik bilan” yozuvi bor.

Isoning tasviri “Dehqon Masih” yoki “Ekuvchi Iso” deb nomlanuvchi noyob variantdir. Xabarda aytilishicha, Irenopolis bir vaqtlar muhim qishloq xo‘jaligi markazi bo‘lgani sababli bu noyob tasvir mintaqadagi unumdorlikning muhimligini anglatadi.

Olimlarning fikriga ko‘ra, non birlashish uchun mo‘ljallangan, ammo ba’zi sabablarga ko‘ra hech qachon ishlatilmagan. Ehtimol, nonvoy uni haddan tashqari ko‘p pishirib yuborgan va u tasodifan tarix uchun saqlanib qolgan. Arxeologlar donlarning aniq tarkibini aniqlash uchun nonlarni paleobotanika tahliliga jo‘natishni, shuningdek, ularni mikroskop va kompyuter tomografiyasi yordamida tekshirishni rejalashtirmoqda – bu ishlab chiqarish jarayoni va karbonizatsiya jarayonini yaxshiroq tushunishga yordam beradi.

Eslatib o‘tamiz, avvalroq Turkiyaning Denizli viloyatida joylashgan qadimiy Kolossaye shahridan 2200 yillik 60 ta qabrdan iborat katta nekropol (qabriston majmuasi) topilgandi.