O‘zbekiston Afg‘onistondan olib o‘tilgan vertolyotlarni qaytarishga rozi bo‘ldi – OAV

O‘zbekiston 2021 yilning avgustida Afg‘onistonda amaldagi hokimiyat qulaganida mamlakatdan olib chiqib ketilgan harbiy vertolyotlarni qaytarishga rozi bo‘lgan. Bu haqda kecha, 10 sentyabr kuni Afg‘onistondagi “Tolibon” muvaqqat hukumati matbuot kotibi Zabihulloh Mujohid ma’lum qildi.

Uning so‘zlariga ko‘ra, o‘sha paytda Afg‘oniston harbiylari tomonidan olib chiqilgan vertolyotlar so‘nggi yillarda O‘zbekiston hududida qolib ketgan. Mujohidning aytishicha, ularning taqdiri Qobul va Toshkent o‘rtasida tinch olib borilgan muzokaralar mavzusi bo‘lib, “Tolibon” doimiy ravishda milliy aktivlarni qaytarish borasidagi keng sa’y-harakatlar doirasida ularni qaytarishni so‘rab kelgan.

“57 harbiy vertolyotning topshirilishi yaqin orada amalga oshishi kutilmoqda. Bu Afg‘onistonning havo kuchlarini tiklash va ikki qo‘shni davlat o‘rtasidagi aloqalarni mustahkamlash yo‘lidagi muhim qadamlardan biri bo‘ladi”, deydi Mujohid.

AQSH Mudofaa vazirligi esa 46 ta samolyot va vertolyotning O‘zbekistonga, yana 18 tasining Tojikistonga olib borilganini tasdiqlagan. Bu parvoz vositalari tarkibiga Mi-17 va UH-60 vertolyotlari, shuningdek, PC-12, C-208, AC-208 va A-29 rusumli qanotli samolyotlar kirgan.

“Tolibon” bir necha bor ikkala davlatdan ham ularni topshirishni talab qilgan, biroq Toshkent va Dushanbedagi rasmiylar bu talablar yuzasidan ochiq izoh bermagan.

AQSHning O‘zbekistondagi elchisi oldinroq bergan bayonotida yangi kelishuvga ko‘ra, O‘zbekistonga qo‘ngan 46 ta uchoq ushbu mamlakat nazoratida qolishini aytgan. AQSHning Afg‘oniston bo‘yicha elchixonasi esa Tojikistonga sobiq afg‘on harbiy samolyotlarini “Tolibon”ga topshirmagani uchun minnatdorlik bildirgan.

Afg‘oniston sobiq xavfsizlik qo‘mondonining aytishicha, “Tolibon” hokimiyatni qo‘lga kiritishidan avval AQSH mamlakat havo kuchlarini jami 229 ta vertolyot – jangovar va transport vositalari bilan ta’minlagan.