Janubiy Koreyada sobiq birinchi xonimnining ishini ko‘rgan sudya o‘lik holda topildi

Janubiy Koreyada katta rezonansga sabab bo‘lgan voqea sodir bo‘ldi. Seul shahridagi Oliy sud binosi yaqinida sudya Shin Jong O o‘lik holda topildi. Bu haqda “Yonhap” xabar berdi.

U 55 yoshda bo‘lgan. Uning jasadi ertalab soat 1 atrofida binoga yaqin gulzor hududidan aniqlangan. Yonidan esa o‘z joniga qasd qilish haqida yozilgan xat topilgan. Hozircha rasmiylar aniq xulosa chiqarmagan, biroq politsiya o‘z joniga qasd qilish ehtimolini asosiy versiyalardan biri sifatida ko‘rib chiqmoqda.

Shin Jong O yaqinda juda muhim va shov-shuvli ishda ishtirok etgan edi. U Janubiy Koreyaning sobiq birinchi xonimi Kim Gon Xiga oid korrupsiya ishining apellyatsiya jarayonida sud hay’atiga raislik qilgan. Bu ish mamlakat siyosiy hayotida katta e’tibor markazida bo‘lgan.

Dastlabki sud qarorida Kim Gon Xiga 20 oy qamoq jazosi tayinlangan edi. U aksiyalar narxini manipulyatsiya qilish va diniy tashkilotdan qimmatbaho sovg‘alar olishda ayblangan. Keyinchalik apellyatsiya sudida, Shin Jong O ishtirokidagi qaror bilan uning jazosi yanada og‘irlashib, 4 yil qamoqqa o‘zgartirilgan.

E’tiborga molik jihati shuki, sudya jasadi yonidan topilgan xatning mazmunida ushbu sud ishi haqida hech qanday eslatma bo‘lmagan. Bu holat voqeaga qo‘shimcha savollar tug‘dirmoqda.

Hozirda politsiya turli ehtimollarni tekshirmoqda, jumladan shaxsiy va kasbiy bosimlar ham o‘rganilmoqda. Voqea Janubiy Koreyada keng muhokama qilinmoqda, chunki u yuqori darajadagi siyosiy va sud jarayonlari bilan bog‘liq bo‘lgan.

Eslatib o‘tamiz, joriy yilning 28 yanvar kuni Seul markaziy okrug sudi sobiq Janubiy Koreya prezidenti Yun Sok Yolning rafiqasi Kim Gon Xini korrupsiyada aybdor deb topgandi.