Столтенбергнинг ўрнини кўзлаётган Рютте Эрдўғандан ёрдам кутяпти
Олам
−
26 Апрель 2999
НAТО Бош котиби лавозимига асосий номзод, Нидерландия Бош вазири Марк Рютте Истанбулга ташрифи чоғида Туркия Президенти Ражаб Тойиб Эрдўғандан ёрдам сўрамоқчи. Бу ҳақда манбаларига таяниб, N-TV хабар берди.
Марк Рютте 31 март куни Эрдўғанга қўнғироқ қилиб, Шимолий Aтлантика альянси Бош котиби лавозимига номзодини қўллаб-қувватлашни сўраган. Энди у Эрдўған билан юзма-юз учрашувда ҳам шу масалани кўтариши кутилмоқда.
Хабарда айтилишича, аввалроқ Эрдўған бир қатор шартларни илгари сурган. Туркия раҳбарининг фикрича, янги Бош котиб терроризмга қарши курашда альянс аъзоларининг хавфсизлиги ва манфаатларига хизмат қилиши, шунингдек, блок бирлигини мустаҳкамлаши ва асосий эътиборни НAТОнинг асосий ролига қаратиши керак.
Рютте иттифоқ Бош котиби лавозимига асосий номзод саналади, чунки унинг номзодини аллақачон НAТОнинг 32 аъзосидан 28 таси қўллаб-қувватлаган.
Маълумот учун, НАТОнинг амалдаги Бош котиби Йенс Столтенберг ўз лавозимида 2024 йил 1 октябргача қолишини тасдиқлаган. Бу қарор ўтган йилнинг 11-12 июль кунлари Вильнюсда бўлиб ўтган саммитда тасдиқланган.
Эслатиб ўтамиз, олдинроқ “Politico” газетаси Америка маъмуриятидаги манбага таяниб, АҚШ Президенти Жо Байден Нидерландия Бош вазири Марк Рюттенинг НАТО Бош котиби лавозимига номзодини қўллаб-қувватлашини ёзганди.
Муқаддасхон Саттарова
Live
Барчаси
