Nemis do‘stlarimiz G‘azodagi dahshatli suratlarni ko‘rishi kerak – Erdo‘g‘an

Turkiya Germaniya hukumatidan terrorizmga qarshi kurash masalalarida ko‘proq yordam kutmoqda. Bu haqda Turkiya Prezidenti Rajab Toyib Erdo‘g‘an germaniyalik mavqedoshi Frank-Valter Shtaynmayer bilan Anqarada o‘tkazgan qo‘shma matbuot anjumanida so‘z ochdi.

Davlat rahbari Anqara va Berlin o‘rtasidagi iqtisodiy hamkorlik istiqbollariga ham to‘xtalib o‘tdi. Turkiya Germaniya bilan o‘zaro savdo hajmini hozirgi 50 milliard dollardan 60 milliard dollarga oshirishni maqsad qilganini qayd etdi. Turkiya rahbari ikki davlatning mudofaa sanoatida cheklovlar bo‘lishi qabul qilinishi mumkin emasligini ta’kidladi.

“Umid qilamanki, bundan buyon Turkiya va Germaniya, ayniqsa, mudofaa sanoatidagi to‘siqlarni emas, qo‘shma ishlab chiqarish loyihalarini muhokama qiladi”, degan Erdo‘g‘an.

Prezident yettinchi oydirki, Isroil armiyasining agressiyasi davom etayotgan G‘azo sektoridagi vaziyatga ham izoh berdi. Davlat rahbari Isroil rasmiylarining G‘azo sektoridagi insoniyatga qarshi jinoyatlar va qirg‘inlarni xalqaro kun tartibidan olib tashlash borasidagi sa’y-harakatlari qo‘llab-quvvatlanmasligi kerakligini ta’kidladi.

U Turkiya G‘azoda o‘t ochishni to‘xtatish va Falastin aholisiga yetarli miqdorda insonparvarlik yordamining uzluksiz yetkazilishi uchun sa’y-harakatlarini oshirishda davom etishiga ishontirdi.

Shuningdek, Erdo‘g‘an Turkiya endi Isroil bilan intensiv savdo aloqalarini davom ettirmasligini ta’kidladi.

“Bu nihoyasiga yetdi. Bu haqda yaqinda Tashqi ishlar vazirimiz ma’lum qildi”, deydi Erdo‘g‘an.

Uning aytishicha, Isroil Bosh vaziri Binyamin Netanyaxu siyosiy hayotini uzaytirish maqsadida butun mintaqa, jumladan, o‘z fuqarolari hayotini xavf ostiga qo‘ymoqda.

“Afsuski, G‘azoda bolalar, ayollar va qariyalar o‘limining dahshatli surati bor. Nemis do‘stlarimiz bu rasmni ko‘rishlari kerak. G‘azo va Falastin butunlay vayron bo‘ldi”, deya urg‘uladi Erdo‘g‘an.

Uning ta’kidlashicha, Turkiya hozirda Isroil va HAMAS o‘rtasida mahbuslar almashinuviga erishish uchun choralar ko‘rmoqda.

"Umid qilamizki, bu harakatlar muvaffaqiyatli bo‘ladi", deydi Prezident.

O‘z navbatida, Shtaynmayer Falastin masalasini faqat ikki davlat tamoyili asosida hal qilish mumkin ekanini aytdi.

“Isroil xavfsizligini falastinliklar uchun siyosiy istiqbolsiz ta’minlab bo‘lmaydi. Bunday istiqbol faqat ikki davlatga asoslangan yechimdir”, degan siyosatchi.

Germaniya Prezidenti ikki davlat NATO, G20 va ayniqsa, Yaqin Sharqdagi o‘zgarishlarni hisobga olgan holda axborot va fikr almashishi kerak, deb hisoblashini bildirdi. 

“Turkiya va Yevropa Ittifoqi o‘rtasidagi munosabatlarda matbuot erkinligi va qonun ustuvorligi tamoyillari nihoyatda muhim. O‘tgan haftada bo‘lib o‘tgan YeI sammitida biz bu masalada, masalan, viza masalasida aniq yutuqlarga erishish uchun harakat qilishimiz kerakligini aytdik", deydi Shtaynmayer.

Germaniya rahbari Erdo‘g‘an bilan Rossiya-Ukraina urushini ham muhokama qilganini va AQSHning Ukrainaga yordam berishi so‘roq ostida ekanini aytdi.

“Biz bilamizki, Turkiya ham Ukrainani qo‘llab-quvvatlaydi. Biz ushbu yordamni xuddi shu tarzda taqdim etishga harakat qilamiz. Kelajakda bu yordamni intensiv, harbiy va iqtisodiy jihatdan davom ettiramiz”, degan Prezident.

Bir necha hafta ichida Germaniyada “Ukrainani qayta qurish konferensiyasi” tashkil etilishini qayd etgan Shtaynmayer Prezident Erdo‘g‘anni anjumanga taklif qildi.

G‘azodagi so‘nggi voqealar haqida gapirar ekan Germaniya Prezidenti urushning butun mintaqaga tarqalishining oldini olish zarurligini ta’kidladi.

“Falastinliklar uchun siyosiy istiqbolsiz Isroil o‘rta va uzoq muddatda xavfsizlik bo‘lishi mumkin emas. Oxir-oqibat, ikki davlat yechimi faqat siyosiy qarash bo‘lishi mumkin va biz bu yo‘nalishda yana qadam tashlashimiz kerak", degan Prezident.