Ҳормуз бўғозидаги қатнов 30 кунда тикланиши мумкин

АҚШ ва Эрон урушни якунлаш ҳамда Ҳормуз бўғозини қайта очиш бўйича келишувга яқинлашди. Томонлар 60 кунлик сулҳни узайтиришни назарда тутувчи меморандум лойиҳасини ишлаб чиққан. Бу ҳақда “The Washington Post” хабар берди.

Ҳужжат имзоланса, Эрон Ҳормуз бўғозини дарҳол қайта очади ва 30 кун ичида денгиз қатновини урушдан олдинги ҳолатга қайтариш чораларини кўради. Шунингдек, Эрон, АҚШ ва уларнинг иттифоқчилари барча фронтларда, жумладан Ливанда ҳам ҳарбий ҳаракатларни тўхтатишини эълон қилиши кўзда тутилган.

Келишув лойиҳасида Эрон ядро қуроли яратмаслик мажбуриятини яна бир бор тасдиқлаши ва юқори бойитилган уран захираларидан воз кечиши белгиланган. АҚШ маъмурияти вакилларининг айтишича, кейинги икки ой давомида бу уранни йўқ қилиш механизми муҳокама қилинади.

АҚШ Президенти Дональд Трамп эса музокаралар “тартибли ва конструктив” тарзда давом этаётганини билдирган. Унга кўра, якуний тафсилотлар ҳали муҳокама қилинмоқда ва шошилиш керак эмас.

Эрон томони эса Ҳормуз бўғозининг босқичма-босқич очилишини маълум қилган. Дастлаб АҚШ Эроннинг музлатилган 12 миллиард долларлик активларини бўшатади, бўғозда миналардан тозалаш ишлари бошланади ва АҚШ блокадаси юмшатилади. Бундан ташқари, келишув доирасида АҚШ Эрон нефтини экспорт қилишга рухсат берувчи санкцион истисноларни ҳам жорий қилиши мумкин.

Эслатиб ўтамиз, аввалроқ Вашингтон Теҳрон билан урушни тугатиш ва стратегик аҳамиятга эга бўлган Ҳормуз бўғозини очиш бўйича келишувга жуда яқин тургани тўғрисида хабар берилган эди.