Орбан сайловда мағлуб бўлди. Венгрияда бош вазир ўзгаради

Венгриядаги парламент сайловарида Бош вазир Виктор Орбан мағлубиятни тан олди ва ҳатто мухолифатда бўлса ҳам мамлакатга хизмат қилишини билдирди. Бу ҳақда у кеча, 12 апрель куни мамлакат пойтахти Будапештда, ўз тарафдорларига қилган мурожаатида айтиб ўтди.

Орбан тарафдорларига мурожаат қилар экан, “қандай бўлмасин, биз мамлакатга хизмат қилишда давом этамиз” дея таъкидлаган.

Сайлов натижаларига кўра, мухолифат етакчиси Петер Мадьяр ва унинг “Тиса” партияси парламентда катта устунликка эришмоқда. Овозларнинг қарийб 85 фоизи санаб чиқилганидан сўнг, партия 199 ўриндан 138 тасини қўлга киритиши мумкинлиги маълум қилинди, бу эса 3/2 кўпчиликни англатади. Шу билан бирга, сайловчилар фаоллиги рекорд даражага етган.

Маълумотларга кўра, Виктор Орбан сайловдан олдин рақиби Петер Мадьярни телефон орқали табриклаган.

Петер Мадьяр ҳам ўз тарафдорлари олдида сўзга чиқиб, ғалабасини эълон қилган.

“Биз биргаликда Орбан тизимини алмаштирдик ва Венгрияни озод қилдик – мамлакатимизни ўзимизга қайтардик”, деган у.

62 ёшли Орбан 2010 йилдан буён ҳокимиятда эди. Бу галги сайловларда эса 45 ёшли Мадьяр илк бор жиддий рақобатчи сифатида майдонга чиқиб, ғалабани илиб кетди. У коррупцияга қарши курашиш, тизимли ислоҳотлар ўтказиш ва янги конституция ишлаб чиқишни ваъда қилган. Шунингдек, у Венгрияни Россиядан узоқлаштириш ва НАТОдаги ишончли ҳамкор сифатидаги ролини тиклаш тарафдори эканини билдирган.

Орбан эса Россия Президенти Владимир Путиннинг Европадаги асосий ҳамкорларидан бири саналади. АҚШ Президенти Дональд Трамп ҳам Орбанни қўллаб-қувватлаган. У агар Орбан бош вазирликда қолса, АҚШ Венгриянинг гуллаб-яшнашига ҳисса қўшишга тайёрлигини айтган.