23 та ҳудудни сув босган: Тошкентдаги тошқин сабаблари айтилди (видео)

Кеча, 10 май куни Тошкент шаҳрида кучли ёғингарчилик оқибатида шаҳарнинг 8 та туманидаги 23 та манзилдан сув тўпланиши ҳолатлари бўйича Тошкент шаҳар ҳокимлигига бир қанча мурожаатлар келиб тушган. Шу бўйича шаҳар ҳокимлиги матбуоти расмий муносабат билдирди.

Маълумотига кўра, 10 май куни ёғингарчилик миқдори 35 миллиметрни ташкил этган. Бу миқдорнинг асосий қисми икки соатдан камроқ вақт ичида ёғган бўлиб, ўртача ойлик ёғингарчилик меъёрининг ярмидан кўпроғини ташкил этган. Хабар қилинишича, Тошкентдаги мавжуд ёмғир сувларини оқизиш тизими бир кеча-кундузда 20 миллиметргача ёғингарчиликни қабул қилишга мўлжалланган. Шаҳарнинг ишлаб чиқилган янги бош режасига мувофиқ, тизимнинг ўтказувчанлик қувватини бир кеча-кундузда 36 миллиметргача босқичма-босқич ошириш кўзда тутилган.

Шундай қилиб, энг кучли ёмғир пайтида шаҳар сув оқизиш инфратузилмаси бош режада назарда тутилган истиқболдаги ҳисоб-китоб параметрларига яқин бўлган кескин ва қисқа муддатли юкламага дуч келган.

Айрим нуқталарда келётган сув ҳажми бир вақтнинг ўзида мавжуд ирригация тармоқлари ва қувурларнинг ўтказувчанлик қувватидан ошиб кетгани, оқибатда бир қатор ҳудудларда ёмғир суви тўпланиб қолган.

Билдирилишича, айрим жойларда маҳаллий омиллар ҳам вазиятни янада мураккаблаштирмоқда. Сув оқизиш элементларининг чиқиндилар билан тиқилиб қолиши, ўзбошимчалик билан қурилган иншоотлар, ариқ ва ирригация тизимларининг автотураргоҳ ёки бошқа хўжалик эҳтиёжлари учун тўсиб қўйилиши шулар жумласидан. Ҳар бир бундай ҳолат шаҳар миқёсида бутун сув оқизиш тизимининг фаолиятига бевосита таъсир кўрсатган.

Оқибатларни зудлик билан бартараф этиш учун Фавқулодда вазиятлар вазирлиги, дренаж-коллектор тизимлари, каналлар, коммунал хизматлар ва бошқа тегишли ташкилотларнинг мутахассислари ҳамда бригадалари жалб этилган. Жойларда 60 дан ортиқ махсус техникалар ноқулайликни бартараф этишда иштирок этган.
Кўрилган чоралар натижасида сув тўпланиши оқибатлари бир соат ичида тўлиқ бартараф этилган.

Ҳокимлик ахборотига кўра, ҳар бир манзил бўйича ишчи гуруҳлар томонидан вазият бирламчи тарзда ўрганилиб, қуйидаги чоралар кўриб чиқилмоқда:

• 5 та манзилда ирригация тизимини қуриш;
• битта ҳудудни лойиҳачилар билан биргаликда қайта ўрганиб чиқиш;
• қўшимча 3 та дюкер ўрнатиш;
• битта объектда диаметри 800 мм бўлган, бошқа бир қатор ҳудудларда эса диаметри 500 мм бўлган қувурларни ўрнатиш;
• қўшимча насос агрегатларини ўрнатиш ва сув чиқариш қувватини ошириш;
• 6 та қўшимча сув қабул қилиш панжарасини монтаж қилиш;
• тизимнинг айрим қисмлари ўтказувчанлик қувватини кучайтириш.

Эслатиб ўтамиз, аввалроқ Тошкент шаҳрининг айрим кўчалари ва автомобиль йўллари сувга тўлиб қолгани хабар қилинган эди.

Ойбек Рустамов