АҚШ БМТнинг Ғазода ўт очишни тўхтатиш бўйича резолюциясини блоклади

АҚШнинг БМТдаги доимий вакили Ғазо секторида ўт очишни тўхтатишга чақирувчи БМТ Хавфсизлик кенгаши резолюцияси лойиҳасига вето қўйди ва бу ҳужжатнинг қабул қилинишига амалда тўсқинлик қилди. 

Вашингтон ўз қарорини матнда ҲАМАСни қоралаш йўқлиги билан изоҳлади.

Резолюция лойиҳаси Кенгашнинг доимий бўлмаган ўн нафар аъзоси (E10) номидан Словения томонидан мувофиқлаштирилган ҳолда тақдим этилган. Ҳужжатда Ғазога зудлик билан инсонпарварлик аралашуви зарурлиги, Исроил ҳужумларининг давом этиши тинч аҳоли аҳволининг кескин ёмонлашишига олиб келгани таъкидланган.

Овоз беришда Хавфсизлик Кенгашининг 15 аъзосидан 14 нафари резолюцияни қўллаб-қувватлади. Кенгашнинг доимий аъзоси сифатида вето ҳуқуқидан фойдаланган ҳолда фақат АҚШ қарши овоз берди. АҚШнинг БМТдаги доимий вакили Дороти Шининг айтишича, Америка томони таклиф этилаётган матннинг мазмуни ҳам, шакли ҳам “қабул қилиб бўлмайдиган” деб ҳисоблайди.

“Биз бу лойиҳага қарши чиққанимиз ажабланарли эмас. Биз ҲАМАСни қораламайдиган ҳар қандай ташаббусни қўллаб-қувватламаслигимизни очиқ айтдик”, деди Ши.

Словениянинг БМТдаги доимий вакили Самуэль Жбогар E10 гуруҳи номидан нутқ сўзлаб, резолюция блокланганидан афсусда эканлигини билдирди.

“Резолюция қабул қилинмади, бироқ 14 та ёқлаб овоз берилгани кучли сигналдир”.

Жбогарнинг таъкидлашича, лойиҳани тақдим этган давлатлар Кенгашда консенсусга эришиш учун атайлаб фақат гуманитар вазиятга эътибор қаратган. У инсонпарварлик ёрдамидан фойдаланишни чеклаш ва фуқароларни атайлаб озиқ-овқатдан маҳрум қилиш халқаро ҳуқуққа зид эканлигини ва уни ҳеч қандай уруш мақсадлари билан оқлаб бўлмаслигини эслатди.

“Бу бизнинг умумий позициямиз бўлишига умид қилган эдик”, дея қўшимча қилди у.

Резолюция лойиҳаси кеча, 4 июнь куни Хавфсизлик Кенгашига тақдим этилган ва Ғазода очарчилик хавфи ортиб бораётган бир шароитда шошилинч инсонпарварлик ёрдамини кўрсатишга чақирилган. Ташаббусни қўллаб-қувватлаган давлатлар қаторида Словения, Жазоир, Дания, Греция, Гаяна, Панама, Покистон, Жанубий Корея, Серра-Леоне ва Сомали ҳам бор эди.