АҚШ қуроллари аввал Европага етказилади – Рютте

НАТО Бош котиби Марк Рютте Украина учун етказилиши керак бўлган АҚШ қуроллари аввал Европага жўнатилишини айтди. Бу ҳақда Бош котиб “Fox News” телеканалига берган интервьюсида сўз очди.

Рюттенинг сўзларига кўра, Украинага мўлжалланган Америка қуроллари аввало Европага юборилади, сўнгра тегишли тартибда Киевга топширилади. 

“Бу – ким тўлаётгани масаласи. Бу қуроллар учун харажатларни европаликлар зиммасига олди”, дея алоҳида таъкидлаб ўтган НАТО Бош котиби. 

Унинг қўшимча қилишича, НАТОнинг логистика бўйича тажрибаси туфайли қурол етказиб бериш энг самарали тарзда йўлга қўйилади. Қурол-яроғ жанговар ҳолатда фойдаланишга тайёр кўринишда жўнатилади.

Маълумот учун, жорий йилнинг 14 июль куни АҚШ раҳбари Дональд Трамп ўзининг Украинадаги можаро бўйича ваъдаланган баёнотини берди. У Украина армиясига қурол етказиб беришни Европа иттифоқчилари ҳисобидан бошлашини маълум қилди ва агар 50 кун ичида уруш тўхтатилмаса, Россия ҳамда унинг савдо шерикларига нисбатан 100 фоиз бож жорий этишини ваъда қилди. Европа дипломатияси раҳбари Кая Каллас эса АҚШ Президенти Дональд Трамп Россия етакчиси Владимир Путинга Украина бўйича тинчлик битимини тузиш учун берган 50 кун жуда узоқлиги ҳақида гапирди.

Эслатиб ўтамиз, аввалроқ Владимир Путин ва Дональд Трампнинг яқинда бўлиб ўтган суҳбати тафсилотларига таяниб, “Axios” нашри Россия яқин икки ой ичида Украинадаги ҳужумларини кучайтириш ниятида эканлиги ҳақида ёзганди.