АҚШ уруш учун юз миллионлаб доллар сарфламоқда – FT

АҚШ Эронга қарши ҳарбий операция учун кунига юз миллионлаб доллар сарфламоқда. Бу ҳақда “Financial Times” хабар берди.

Нашрга кўра, Америка тадбиркорлик институти (AEI) катта илмий ходими ва Пентагон бюджет бошқармасининг собиқ юқори лавозимли ходими Элейн Маккаскер АҚШ Эронга қарши операция учун қанча маблағ сарфлаётганини ҳисоблаб чиққан.

Маълумотларга кўра, АҚШнинг беш ҳафталик ҳарбий кампанияси қиймати – Трамп февраль охирида Эронга ҳужум қилиш ҳақида буйруқ берган пайтдан бошлаб 22,3 дан 31 миллиард долларгачани ташкил этган. Шу билан бирга, ушбу сумманинг қарийб ўндан бир қисми – 2,1 дан 3,6 миллиард долларгачаси жанговар шикастланишлар ва ҳарбий техникаларни алмаштириш ҳиссасига тўғри келади.

Маккаскернинг сўзларига кўра, шикастланган техникани баъзан бир неча кун ичида таъмирлаш мумкин, бироқ бутунлай вайрон бўлган баъзи тизимларни алмаштириш йиллаб вақт талаб қилади. Бундан ташқари, уруш таъмирлаш учун ўта муҳим бўлган материалларни етказиб беришдаги муаммоларни янада чуқурлаштириши эҳтимолдан холи эмас.

Шу билан бирга, АҚШнинг бошқа бир собиқ юқори лавозимли ҳарбий мулозими зарарнинг катта қисмини АҚШ “ўзига-ўзи етказганини” тан олган. Бунга ресурслардан фойдаланишдаги хатолар, ёмон ҳимоя ёки тизимларни қўллашдаги носозликлар сабаб бўлган. Бундан ташқари, Пентагон аллақачон Конгрессдан Эрондаги операция учун қўшимча 200 миллиард доллар сўраган.

Эслатиб ўтамиз, аввалроқ АҚШ Президенти Дональд Трамп Оқ уйдаги брифинг пайтида АҚШ Эронни бир кечада йўқ қилишга қодирлигини ва буни бугун, 7 апрель куниёқ амалга ошириши мумкинлигини айтган эди.