АҚШ ва Хитойнинг TikTok бўйича савдоси “пишди” – CNN

Хитой АҚШ билан TikTok ижтимоий тармоғини сотиш шартлари бўйича келишувга эришди. Буни АҚШ Молия вазири Скотт Бессент тасдиқлаган. Бу ҳақда CNN хабар берди.  

Бессент тафсилотларни ошкор қилишдан бош тортиб, барча маълумотлар жорий йилнинг 19 сентябрь куни АҚШ Президенти Дональд Трамп ва Хитой Халқ Республикаси Раиси Си Цзиньпин учрашувида эълон қилинишини билдирган.

Бунга қадар эса Дональд Трамп Truth Social ижтимоий тармоғидаги саҳифасида мамлакат ёшлари “жуда сақлаб қолишни истаган муайян компания сотилиши” бўйича келишувга эришилгани ҳақида ёзган.

Маълумот учун, TikTok Хитойнинг ByteDance компаниясига тегишли. АҚШ ҳукумати Хитой ҳукумати компанияни мажбуран Пекинга америкалик фойдаланувчиларнинг маълумотларини топширишга ундаши мумкинлигидан хавотирда. Шу сабабли, ҳозирги кўринишда бу ижтимоий тармоқ АҚШда миллий хавфсизликка таҳдид солади, деб ҳисобланади.

2024 йилда АҚШ Конгресси ByteDance’ни мамлакатдаги бўлинмасини сотишга мажбур қилувчи қонун қабул қилган эди. Акс ҳолда TikTok тўлиқ блокланиши билан таҳдид қилинган. Аввалига компанияга бу иш учун 270 кун берилган, бироқ кейинчалик сотиш муддати бир неча марта чўзилган.