Аргентинада Мессининг дунёдаги энг баланд ҳайкали очилди (видео)

Аргентинада саккиз карра “Олтин тўп” соҳиби ва жаҳон чемпиони Лионель Мессининг энг баланд ҳайкали очилди. Бу ҳақда “TyC Sports” хабар берди. 

Манбага кўра, ҳайкалнинг баландлиги 26 метр, оғирлиги эса 70 тоннани ташкил этади. Ҳайкал дизайни ҳайкалтарош Алдо Бероис томонидан ишлаб чиқилган.

Қизиғи, жорий йилнинг июнь ойи бошида Ҳиндистоннинг Колката шаҳрида Мессининг 21 метрлик ҳайкали кучли шамоллар туфайли хавфсизлик билан боғлиқ шикоятлардан кейин бузилган эди.

Маълумот учун, 38 ёшли Месси 2023 йилдан буён “Интер Майами” сафида тўп суриб келмоқда. Европа фаолияти давомида у “Барселона” ва “Пари Сен-Жермен” жамоалари шарафини ҳимоя қилган.

Аргентиналик юлдуз клублар даражасида тўрт марта Чемпионлар лигаси, уч марта UEFA Суперкубоги ва уч марта клублар ўртасидаги жаҳон чемпионати ғолиби бўлган. Шунингдек, у Аргентина терма жамоаси билан 2022 йилги Жаҳон чемпионатида зафар қучган, 2014 йилги мундиал финалчиси бўлган, 2008 йилги Олимпия ўйинлари чемпиони ҳамда икки карра Америка Кубоги ғолиби (2021, 2024) ҳисобланади.