“Арсенал” Йилдиз учун курашга қўшилди

Лондоннинг “Арсенал” клуби “Ювентус”нинг 20 ёшли туркиялик футболчиси Кенан Йилдизга қизиқиш билдирмоқда. “Тўпчилар” бош мураббийи Микель Артета Йилдизни устувор мақсадлардан бири деб ҳисобламоқда. Бу ҳақда “Fichajes” нашри хабар берди.

Манбага кўра, “Арсенал” Йилдизнинг “Ювентус”даги шартномаси ҳолатини диққат билан кузатмоқда. Ҳозирда футболчи ва клуб ўртасида маош бўйича тафовут мавжуд. Турин клубига Кенанга йиллик 5 миллион евро таклиф қилаётган бўлса, Йилдиз 6-7 миллион евро талаб қилмоқда. Бу келишмовчилик “Арсенал”га туркиялик футболчини ўз сафига қўшиб олиш учун имконият яратади.

“Ювентус” энди қийин танлов олдида: ёш истеъдодни сақлаб қолиш ёки уни “Арсенал”га қўйиб юбориш. Музокараларнинг тўхтаб қолиши бошқа Европа клубларининг ҳам эътиборини жалб қилиши мумкин.

Маълумот учун, Кенан Йилдиз жорий мавсумда “Ювентус” сафида 18 та учрашувда майдонга тушиб, 5 гол ва 6 та голли узатма амалга оширган.

Эслатиб ўтамиз, аввалроқ Испаниянинг “Реал Мадрид” жамоаси бош мураббийи Хаби Алонсо ёзги трансфер ойнасида “Ювентус” футболчиси Кенан Йилдизни қўлга киритишни раҳбариятдан сўраганлиги ҳақида хабар берилган эди.