БАА Президенти Кремлга Путинни йўқлаб борди (видео)

Бугун, 7 август куни Россияга расмий ташриф билан борган БАА Президенти Шайх Муҳаммад бин Зоид Ол Наҳаён Президент Владимир Путин билан учрашди. Бу ҳақда Россия Президентининг матбуот хизмати хабар берди.

Қайд этилишича, меҳмон Кремлнинг Георгийлар залида тантанали кутиб олинган. Бу маросим доирасида икки давлат делегациялари ҳам таништирилган. Шундан сўнг Россия билан БАА ўртасидаги музокараларнинг бошланиши эълон қилинган. 

Путин Россия БАА билан алоқаларни алоҳида қадрлашини таъкидлаган. У БАА Россия учун дўстона мамлакат экани, сиёсий даражадаги яқин алоқалар, савдо-иқтисодий ва инвестиция соҳаларидаги ҳамкорлик изчил ривожланаётганини айтган. 

Президентнинг сўзларига кўра, Россиянинг БААга қилган инвестициялари миқдори БААнинг Россияга қилган инвестицияларидан деярли икки баравар кўп. Шу билан бирга, Россия тўғридан тўғри инвестициялар жамғармаси ва БААнинг суверен жамғармаси ўртасидаги ҳамкорлик самарали кечаётгани такидланган.

Путин, шунингдек, Россия ва БАА ўртасидаги гуманитар соҳадаги алоқалар, хусусан, таълим ва маданият йўналишидаги ҳамкорлик ҳақида сўз юритган.

Путин минтақавий ва халқаро хавфсизлик масалалари юзасидан фикр алмашиш муҳимлигини таъкидлаган. 

Муҳаммад бин Зоид Ол Наҳаён эса, ўз навбатида, Россия Президентига самимий қабул учун миннатдорлик билдирган ва Москвада бўлишдан мамнунлигини айтган. У Россия бой тарихга эга мамлакат эканини эътироф этган ва икки давлат ўртасидаги алоқалар сўнгги йилларда жуда тез ривожланиб бораётганини таъкидлаган. 

БАА Президентининг айтишича, икки мамлакат ўртасидаги савдо айланмаси 11,5 миллиард долларни ташкил қилмоқда.

Эслатиб ўтамиз, Муҳаммад бин Зоид Ол Наҳаён охирги марта ўтган йили 21 октябрь куни Қозондаги BRICS саммити тадбирларида иштирок этиш учун Россияга борганида Путиб билан учрашганди. Жорий йил 24 март куни эса улар ўртасида телефон суҳбати бўлиб ўтди. Ўшанда Путин Россия ва Украина ўртасида ушлаб турилган шахслар алмашинувини амалга оширишда БАА томонидан кўрсатилаётган фаол воситачилик ёрдами учун миннатдорлик билдирган.