“Барселона” Канселу билан шартнома имзолади

Испаниянинг “Барселона” жамоаси португалиялик ҳимоячи Жоау Канселу билан шартнома имзолаганини эълон қилди. Бу ҳақда клуб матбуот хизмати хабар берди.

Каталония клуби футболчини жорий мавсум охиригача ижарага олди. Келишувнинг молиявий тафсилотлари ошкор қилинмаган. Канселу “кўк-анорранглилар” сафида 2-рақамда ҳаракат қилади.

Футболчининг тўлиқ шартномаси ҳануз Саудия Арабистонининг “Ал-Ҳилол” клубига тегишли.

Қайд этилишича, Канселуга Италиянинг “Интер” клуби ҳам жиддий қизиқиш билдирган, бироқ португалиялик футболчи шахсан “Барселона” вариантини танлаган. Аввалроқ, ОАВда “нерадзурри” Канселуни қайтариш бўйича келишувга яқин экани ҳақида хабарлар тарқалган эди, аммо кейинчалик музокаралар тўхтаб қолган. 

Жоау Канселу 2024 йил ёзидан буён “Ал-Ҳилол” сафида ҳаракат қилиб келмоқда. Жорий мавсумда у барча мусобақаларда олтита ўйинда майдонга тушиб, битта гол ва иккита голли узатмага муаллифлик қилди. Футболчининг Саудия клуби билан амалдаги шартномаси 2027 йил июнь охиригача мўлжалланган. 

Маълумот учун, “Transfermarkt” портали ҳозирда Канселунинг бозор қийматини 10 миллион еврога баҳоламоқда.