Байден даволанишни бошлагандан бери илк бор кўриниш берди

АҚШнинг собиқ президенти Жо Байден простата бези саратонини даволашни бошлагани ҳақидаги хабарлардан сўнг илк бор жамоатчиликка кўриниш берди. Бу ҳақда “The New York Post” хабар берди.

82 ёшли сиёсатчи Делавэр штатидаги узоқ йиллар давомида мунтазам ташриф буюриб келган Авлиё Иосиф черковидаги кечки ибодат маросимида қатнашган. Нашр томонидан эълон қилинган суратларда кўринишича, Байден ёнида юрган аёлга суянган, унинг ўнг кўзи устида эса яқинда тери саратонини олиб ташлаш бўйича ўтказилган операциядан қолган янги чандиқ изи кўриниб турибди. 

50 дақиқалик ибодат якунлангач, Байден аҳоли билан яна тахминан 10 дақиқа суҳбатлашган. ОАВга кўра, бу простата бези саратонининг суякларга метастаз берган тўртинчи босқичи учун беш ҳафталик нурланиш ва гормонал терапия курсини бошлагани маълум қилингандан кейинги унинг жамоатчилик олдидаги биринчи кўринишидир.

Шифокорлар Байденга саратоннинг агрессив тури ташхис қилингани, бироқ касаллик гормонал терапияга жавоб қайтара олишини қайд этган. Ташхис Байден сийдик чиқаришдаги муаммолар билан шифокорларга мурожаат қилганидан сўнг қўйилган, текширувлар давомида простатада кичик тугун аниқланган. Бундан ташқари, собиқ президент икки бор тери саратонини олиб ташлаш операциясини бошидан кечирган – ўтган ой пешонасида ва 2023 йилда кўкрак қисмида.

2024 йилнинг июль ойида Байден Дональд Трамп билан муваффақиятсиз дебатдан сўнг, қайта сайланиш кампаниясини тўхтатган ва Камала Ҳаррис номзодини қўллаб-қувватлаган эди. 2025 йил январидан буён у асосан хусусий ҳаёт тарзини олиб бормоқда. Унинг ёрдамчиларининг айтишича, собиқ президент давом этаётган даволанишига қарамай, Бостон шаҳридаги мукофотларни топшириш маросими ва Небраска штатида Демократик партия учун маблағ йиғиш тадбирида иштирок этишни режалаштирмоқда.

Эслатиб ўтамиз, аввалроқ Жо Байден президентлик муддати тугаганидан кейин оддий ва тежамкор ҳаёт тарзини олиб бораётгани ҳақида хабар бериганди.