Бир бирига қарши баёнотлар: Трамп Эронга ёрдам берганини айтди

АҚШ Президенти Дональд Трамп нима учун Эронга яна вақт берганини тушунтирди. Трампнинг бу ҳақдаги сўзларини CBS News нашри келтирди.

Унинг айтишича, Эрон зарбаларни 7 кунга кечиктиришни сўраган, аммо у 10 кун муҳлат берган.

“Улар 7 кун сўрашди, мен эса 10 кун бераман, дедим. Чунки улар менга кемалар берди”, деган Трамп. 

Шу билан бирга, “The Wall Street Journal” нашрининг ёзишича, музокараларда воситачилар Эрон аслида 10 кунлик кечиктиришни сўрамаганини айтган. Бундан ташқари, Эрон ҳали АҚШнинг 15 банддан иборат тинчлик режасига жавоб ҳам бермаган.

Трамп аввалроқ ўзининг Truth Social тармоғида Эрон илтимосига биноан зарбаларни 10 кунга кечиктирганини маълум қилган эди.
Дастлаб, АҚШ Президенти Эрон агар Ҳормуз бўғозини очмаса, унинг энергетика объектларига зарба беришини айтган. Бироқ 23 март куни у музокаралар сабабли ҳужумларни 5 кунга кечиктирганини билдирган.

Бу ҳафта Трамп яна бир баёнот бериб, Эрон АҚШга “катта совға” қилганини айтди. Кейинроқ у бу гап билан Эрон 10 та нефть ташувчи кемага Ҳормуз бўғози орқали ўтишга рухсат берганини назарда тутганини тушунтирди.

Шунингдек, АҚШ Эрон томонига урушни тўхтатиш бўйича 15 банддан иборат режа тақдим этган. Аммо Эрон бу режани рад этиб, ўзининг 5 банддан иборат шартларини таклиф қилган.

Эслатиб ўтамиз, аввалроқ Америка қўшинларининг Эрондаги қуруқликдаги операцияси яқин орада бошланиши мумкинлиги ҳақида хабар берилганди.